Qeveria franceze ka shqyrtuar mundësinë e bllokimit të rrjeteve sociale dhe kufizimit të internetit celular gjatë protestave të 24 tetorit, sipas dy burimeve të njohura me planin, të cituara nga POLITICO.
Gjatë javës përpara demonstratave, Ministria e Brendshme kontaktoi operatorët e telekomunikacionit për të diskutuar ndërprerjen e aksesit në zona të caktuara, me synimin për të penguar koordinimin e personave të përfshirë në trazira.
Përpjekja arriti deri te një kërkesë e drejtpërdrejtë e kryeministrit Sébastien Lecornu, i cili u kërkoi operatorëve të përgatiteshin për bllokimin e TikTok-ut, Instagramit, Snapchat-it dhe X-it. Letra u bë publike nga media franceze Blast, e cila raportoi e para për kërkesën.
Të kontaktuara nga POLITICO, zyra e kryeministrit, Ministria e Teknologjisë dhe Ministria e Brendshme nuk e mohuan nismën apo ekzistencën e letrës. Raportimi nuk konfirmon se bllokimi u zbatua.
Autoritetet druheshin se dhuna e 17 tetorit mund të përsëritej ose të përshkallëzohej fundjavën pasuese. Megjithatë, më 24 tetor u regjistruan shumë më pak incidente.
“Ajo që donin mbi të gjitha ishte të bllokonin kanalet e komunikimit që u lejojnë bandave të takohen dhe të organizohen”, deklaroi një punonjës i një kompanie telekomunikacioni, në kushte anonimiteti.
Një ndërhyrje e tillë do të pengonte edhe komunikimin e protestuesve paqësorë. Sipas raportimit, bllokimi i rrjeteve sociale vetëm brenda një zone të kufizuar, si një lagje, nuk është teknikisht i mundur. Ndërprerja e internetit celular do të shkaktonte gjithashtu probleme për pagesat me telefon, pajisjet e mbikëqyrjes së sigurisë dhe komunikimet e emergjencës.
Qeveria shqyrtoi edhe një alternativë më të kufizuar: çaktivizimin e funksioneve që shfaqin vendndodhjen, për të vështirësuar organizimin e grumbullimeve.
Ndërkohë, kufizime të tjera për platformat po diskutohen në parlament, në kuadër të projektligjit “Vandalët paguajnë”. Propozimi parashikon përgjegjësi financiare për personat që marrin pjesë me vetëdije në një trazirë, edhe nëse nuk kanë shkaktuar vetë dëme materiale.
I njëjti projektligj do t’i detyronte platformat të hiqnin brenda 24 orësh përmbajtjet që nxisin sulme fizike ose seksuale, vjedhje dhe shkatërrim prone, kur ato mund të shkaktojnë cenim të rëndë të rendit publik. Për përmbajtjet që nxisin kryengritje, afati i propozuar është një orë.
Ligjvënës të tjerë kanë propozuar përdorimin e mbikëqyrjes video me algoritme për identifikimin e personave që shkaktojnë trazira, si dhe masa ndaj platformave të tregtisë online që nuk parandalojnë shitjen e mallrave të vjedhura.
