Costa para vizitës në Ballkan: Momenti për zgjerimin e BE-së është tani
Presidenti i Këshillit Evropian, Antonio Costa, do të zhvillojë një tur vizitash në gjashtë vendet e Ballkanit Perëndimor në prag të Samitit BE-Ballkani Perëndimor, duke përcjellë një mesazh të qartë mbështetjeje për procesin e zgjerimit të Bashkimit Evropian.
Përmes një reagimi në rrjetin social X, Costa theksoi se perspektiva evropiane e rajonit mbetet konkrete dhe se tashmë ka ardhur koha për rezultate konkrete.
“Këtë javë, do të vizitoj gjashtë partnerët tanë të Ballkanit Perëndimor. Vizita ime në rajon dërgon një sinjal të qartë: angazhimi ynë ndaj Ballkanit Perëndimor është real; dhe kështu është edhe mundësia e zgjerimit. Momenti është aty. Tani është koha për të dhënë rezultate”, shkroi ai.
Turi do të nisë më 1 qershor në Sarajevë, ndërsa më 2 qershor Costa do të vizitojë Tiranë, ku pritet të zhvillojë takime me kryeministrin Edi Rama dhe presidentin Bajram Begaj.
Më 3 qershor ai do të qëndrojë në Prishtinë, ndërsa një ditë më pas do të vizitojë Beograd. Vizita rajonale do të përfundojë në Mali i Zi.
Më 5 qershor, Costa do të bashkëdrejtojë Samitin BE-Ballkani Perëndimor së bashku me Ursula von der Leyen, ku pritet të diskutohen hapat e mëtejshëm të integrimit evropian të vendeve të rajonit.
Vizita vjen në një moment kur Bashkimi Evropian po kërkon të ruajë ritmin e procesit të zgjerimit dhe të forcojë bashkëpunimin me vendet e Ballkanit Perëndimor.
