Parlamenti Italian miraton reformën zgjedhore të Melonit, opozita: Ligj për të mbajtur të djathtën në pushtet

Dhoma e Ulët e Parlamentit italian miratoi këtë të enjte projektligjin për reformën zgjedhore të propozuar nga kryeministrja Giorgia Meloni, një nismë që ka shkaktuar debate të forta politike dhe që opozita e konsideron si një përpjekje për të garantuar qëndrimin e së djathtës në pushtet.

Projektligji u miratua me 217 vota pro, 152 kundër dhe dy abstenime, duke kaluar tashmë për shqyrtim në Senat. Qeveria synon ta miratojë përfundimisht pas pushimeve verore të parlamentit, në fillim të muajit shtator.

Reforma parashikon zëvendësimin e sistemit aktual zgjedhor, i cili kombinon zgjedhjen e deputetëve në zona elektorale me ndarjen proporcionale të mandateve sipas votës kombëtare, me një sistem plotësisht proporcional, ku të gjitha mandatet do të shpërndahen sipas përqindjes së votave të fituara nga partitë.

Një nga elementët më të debatueshëm të projektligjit është parashikimi që çdo koalicion që siguron mbi 42 për qind të votave të përfitojë automatikisht shumicën parlamentare për të formuar qeverinë.

Menjëherë pas votimit, opozita e akuzoi Melonin për manipulim të rregullave zgjedhore në favor të mazhorancës.

Kryetarja e Partisë Demokratike, Elly Schlein, deklaroi se reforma përbën një tradhti ndaj qytetarëve italianë.

“Meloni i ka tradhtuar italianët. Ne do t’ju dërgojmë në shtëpi, pavarësisht se çfarë ligji zgjedhor miratoni”, u shpreh Schlein gjatë debatit në parlament.

Mandati i Giorgia Melonit përfundon në shtator të vitit 2027, por shumë analistë politikë besojnë se ajo mund të shpallë zgjedhje të parakohshme që në prillin e vitit të ardhshëm.

Presioni ndaj kryeministres është shtuar si nga opozita, e cila po tenton të krijojë një front të bashkuar, ashtu edhe brenda kampit të djathtë, ku partia e re National Future, e krijuar nga Roberto Vannacci pas largimit nga Liga, po konkurron për të njëjtin elektorat me “Vëllezërit e Italisë” të Melonit.

Votimi në Dhomën e Ulët erdhi vetëm dy ditë pasi qeveria pësoi një humbje të papritur gjatë shqyrtimit të një amendamenti kyç për reformën zgjedhore. Amendamenti u rrëzua me vetëm një votë diferencë në një votim të fshehtë, çka ngriti dyshime se disa deputetë të koalicionit qeverisës votuan kundër linjës së qeverisë.

Miratimi përfundimtar i reformës tani varet nga Senati, ku qeveria shpreson të sigurojë mbështetjen e nevojshme për ta kthyer projektligjin në ligj përpara zgjedhjeve të ardhshme parlamentare.