Kancelari gjerman Friedrich Merz ka kundërshtuar një program të ri financimi të administratës së presidentit amerikan Donald Trump, me vlerë gati 5 milionë dollarë, që synon mbështetjen e projekteve për “lirinë e shprehjes” dhe “lirinë fetare” në Evropë.

Duke folur në Berlin, Merz deklaroi se Gjermania nuk ndërhyn në proceset zgjedhore të Shteteve të Bashkuara dhe pret të njëjtën qasje edhe nga Uashingtoni.

“Ne nuk ndërhyjmë në zgjedhjet amerikane; gjithmonë i kemi qëndruar këtij parimi. Në të njëjtën mënyrë, nuk dua që qeveria amerikane apo institucionet e lidhura me të të ndërhyjnë në zgjedhjet gjermane”, u shpreh kancelari.

Programi i financimit u prezantua të hënën nga Departamenti Amerikan i Shtetit dhe parashikon një fond prej afro 5 milionë dollarësh për projekte që synojnë forcimin e demokracisë, shtetit të së drejtës, lirisë së shprehjes, lirisë së medias dhe mbrojtjes së të drejtave të njeriut në Evropë.

Sipas njoftimit zyrtar, projektet që do të financohen duhet të trajtojnë çështje si sovraniteti kombëtar, migracioni, censura dhe sfidat ligjore, në përputhje me atë që administrata amerikane e cilëson si “filozofi e përbashkët politike” dhe “trashëgimi të përbashkët qytetërimore perëndimore”.

Sipas raportimit të Financial Times, aplikantët individualë mund të përfitojnë deri në 3 milionë dollarë nga kjo skemë.

Edhe pse programi nuk përmend shprehimisht partitë politike si përfituese, Merz paralajmëroi se legjislacioni gjerman ndalon financimin e partive politike nga burime të huaja.

“Është e paligjshme të financohen partitë politike në Gjermani nga jashtë. Pres që miqtë tanë në mbarë botën të respektojnë këto rregulla ligjore që kemi vendosur në Gjermani”, deklaroi ai.

Nisma amerikane vjen në një kohë kur administrata Trump akuzohet për afrimin me partitë nacionaliste dhe të ekstremit të djathtë në Evropë, përfshirë partinë gjermane Alternativa për Gjermaninë (AfD).

Një zëdhënës i Departamentit Amerikan të Shtetit, duke komentuar reagimin e Merz, deklaroi se administrata Trump mbetet e përkushtuar për mbrojtjen e demokracisë dhe të drejtave të njeriut në Evropë.

“Programet tona në Evropë synojnë të mbështesin aleatët evropianë në mbrojtjen e këtyre të drejtave dhe parimeve, si edhe sovranitetin dhe vetëbesimin e tyre përballë atyre që kërkojnë t’i minojnë”, tha zëdhënësi.

Më herët, zyrtarë të lartë amerikanë kanë mohuar akuzat për ndërhyrje në politikën evropiane, megjithëse kanë zhvilluar takime me përfaqësues të forcave të ekstremit të djathtë, përfshirë AfD-në.

Sipas sondazheve të fundit, AfD renditet aktualisht si forca e parë politike në nivel kombëtar në Gjermani dhe konsiderohet favorite për të fituar zgjedhjet rajonale në landin e Saksoni-Anhalt në muajin shtator.

Në dokumentin e financimit, administrata amerikane kritikon gjithashtu përpjekjet e Bashkimit Evropian për të rregulluar platformat e mëdha teknologjike amerikane, duke argumentuar se disa institucione evropiane po përdorin ligjet kundër gjuhës së urrejtjes dhe rregullat për përmbajtjen online për të kufizuar lirinë e shprehjes dhe pjesëmarrjen politike.