BE zgjat mbrojtjen për refugjatët ukrainas deri në vitin 2028, përjashton burrat që duhet të kryejnë shërbimin ushtarak

Vendet anëtare të Bashkimit Evropian kanë rënë dakord të zgjasin deri në vitin 2028 skemën e mbrojtjes së përkohshme për refugjatët ukrainas, por kanë vendosur kufizime të reja për burrat që kanë detyrime ushtarake ndaj Ukrainës.

Sipas një deklarate të publikuar nga Këshilli i Bashkimit Evropian, në të ardhmen mbrojtja e përkohshme do t’u jepet vetëm personave që përmbushin detyrimet e tyre ushtarake në Ukrainë.

“Duke marrë në konsideratë nevojat në zhvillim të Ukrainës për mbrojtje, mbrojtja e përkohshme do t’u jepet vetëm personave që përmbushin detyrimet e tyre ushtarake në Ukrainë”, thuhet në deklaratë.

Megjithatë, autoritetet evropiane sqarojnë se kufizimi nuk do të prekë personat që tashmë përfitojnë nga kjo skemë.

“Kjo masë do të zbatohet vetëm për aplikantët e rinj për mbrojtje të përkohshme”, theksohet në dokument.

Bashkimi Evropian aktivizoi mekanizmin e mbrojtjes së përkohshme në mars të vitit 2022, menjëherë pas nisjes së pushtimit rus të Ukrainës. Skema u garanton refugjatëve ukrainas të drejtën për të jetuar, punuar dhe studiuar në vendet anëtare të BE-së dhe është zgjatur disa herë që nga hyrja në fuqi.

Vendimi i ri vjen në një kohë kur autoritetet ukrainase kanë shtuar thirrjet për rikthimin e burrave në moshë ushtarake.

Pas një takimi me kancelarin gjerman Friedrich Merz në muajin prill, presidenti ukrainas Volodymyr Zelensky deklaroi se dëshironte që ukrainasit, veçanërisht burrat, të ktheheshin në vend.

“Është çështje drejtësie. Ne kemi ushtarë në front dhe ata kanë nevojë për rotacion”, u shpreh Zelensky.

Edhe Komisioneri Evropian për Migracionin, Magnus Brunner, deklaroi muajin e kaluar se mbrojtja e përkohshme nuk duhet të jepet si rregull për personat që largohen nga Ukraina pa autorizimin e autoriteteve ukrainase, kur kanë detyrime ushtarake.

Që nga shpallja e gjendjes së luftës në shkurt 2022, Ukraina ndalon largimin nga vendi të burrave të moshës 25 deri në 60 vjeç që janë të aftë për shërbim ushtarak, me përjashtime të kufizuara.

Sipas të dhënave të Bashkimit Evropian, aktualisht rreth 1.17 milionë burra ukrainas të rritur përfitojnë nga statusi i mbrojtjes së përkohshme në vendet e BE-së. Ndërkohë, mediat ukrainase raportuan se deri në vitin 2023 rreth 650 mijë burra në moshë ushtarake kishin lënë Ukrainën dhe ishin vendosur në Bashkimin Evropian.