Trump paralajmëron Iranin: Nuk do të ketë armë bërthamore, ose marrëveshje ose veprim
Presidenti i Shteteve të Bashkuara, Donald Trump, ka ashpërsuar qëndrimin ndaj Iranit, duke deklaruar se Uashingtoni nuk do të lejojë në asnjë rrethanë që Teherani të sigurojë armë bërthamore dhe duke lënë të hapur mundësinë e ndërmarrjes së veprimeve të reja ushtarake nëse negociatat dështojnë.
Sipas mediave ndërkombëtare, Trump tha se administrata amerikane ka arritur të sigurojë disa lëshime nga pala iraniane, të cilat, sipas tij, duhet të respektohen.
“Ne kemi marrë lëshime dhe tani ata duhet t’i mbajnë ato. Por nuk do të ketë armë bërthamore”, deklaroi presidenti amerikan.
Ai shtoi se Shtetet e Bashkuara synojnë të kenë kontroll mbi materialet e pasuruara bërthamore të Iranit, duke e cilësuar këtë si një element kyç të çdo marrëveshjeje të mundshme.
Trump theksoi se nuk po kërkon domosdoshmërisht një ndryshim regjimi në Iran, por la të kuptohet se zhvillimet politike në vend mund të ndryshojnë.
“Ose bëjmë një marrëveshje, ose e përfundojmë punën”, u shpreh ai.
Presidenti amerikan foli edhe për një operacion detar të zhvilluar nga Marina amerikane, të cilin e përshkroi si të paprecedentë, duke pretenduar se masat kufizuese u lehtësuan pasi palët mund të jenë pranë një marrëveshjeje diplomatike.
Megjithatë, Trump nënvizoi se preferon një zgjidhje paqësore për të shmangur pasoja për popullin iranian, por paralajmëroi se SHBA-ja ka kapacitetet për të goditur infrastrukturën strategjike të Iranit nëse situata përshkallëzohet.
Nga ana tjetër, ministri i Jashtëm iranian, Abbas Araghchi, hodhi poshtë presionin amerikan, duke deklaruar se negociatat për një marrëveshje përfundimtare nuk mund të nisin për sa kohë Uashingtoni vazhdon me kërcënime.
Sipas tij, SHBA-ja duhet të respektojë angazhimet e mëparshme, ndërsa theksoi se presioni dhe kërcënimet nuk do të ndikojnë te populli iranian apo te forcat e armatosura të vendit.
