Merz mbështet Lituaninë: E respektoj gatishmërinë për t’u mbrojtur nga Rusia

Kancelari gjerman Friedrich Merz deklaroi se e sheh me respekt propozimin e Lituanisë për të hequr ndalimin kushtetues mbi vendosjen e armëve bërthamore në territorin e saj, duke e cilësuar atë një shenjë të seriozitetit me të cilin Vilniusi e percepton kërcënimin nga Rusia.

Pas takimit në Berlin me liderët e shteteve baltike, Merz tha se vendimi i takon Lituanisë, por vlerësoi angazhimin e saj për mbrojtjen e territorit kombëtar dhe të NATO-s.

“Jo vetëm që nuk kam arsye ta kritikoj këtë, por e vlerësoj me respekt gatishmërinë e Lituanisë për të mbrojtur vendin e saj dhe territorin e NATO-s”, u shpreh Merz.

Presidenti i Lituanisë, Gitanas Nausėda, propozoi këtë javë ndryshimin e Kushtetutës për të hequr ndalimin e vendosjes së armëve bërthamore në territorin e vendit.

Sipas tij, Lituania synon të shfrytëzojë të gjitha mundësitë që ofron parandalimi bërthamor dhe të integrohet më tej në mekanizmat e NATO-s.

Lituania, e cila kufizohet me enklavën ruse të Kaliningradit dhe me Bjellorusinë, e konsideron veten një nga vendet më të ekspozuara ndaj kërcënimeve nga Rusia.

Megjithatë, autoritetet lituaneze kanë sqaruar se aktualisht nuk ekzistojnë plane konkrete për vendosjen e armëve bërthamore në territorin e vendit.

Sipas raportimeve, armë bërthamore amerikane janë të dislokuara në kuadër të programit të ndarjes bërthamore të NATO-s në Gjermani, Belgjikë, Holandë, Itali dhe Turqi, ndërsa Britania e Madhe dhe Franca disponojnë arsenalet e tyre bërthamore.

Edhe Polonia ka shprehur interes për t’iu bashkuar sistemit të parandalimit bërthamor të NATO-s dhe po zhvillon bisedime me Shtetet e Bashkuara për këtë çështje.