Presidenti çek sfidon qeverinë: Do të udhëheq delegacionin në samitin e NATO-s

Presidenti i Çekisë, Petr Pavel, ka deklaruar se do të udhëheqë delegacionin çek në samitin e NATO-s që do të zhvillohet javën e ardhshme në Ankara, pavarësisht mosmarrëveshjes së vazhdueshme me qeverinë për rolin e tij në këtë takim.

Duke folur për mediat, Pavel tha se, si kreu i shtetit, ai do të drejtojë delegacionin dhe jo thjesht të marrë pjesë si një prej anëtarëve të tij. Ai shtoi se do të vendosë vetë se në cilat aktivitete të samitit do të marrë pjesë.

Deklarata e presidentit vjen një ditë pasi Gjykata Kushtetuese urdhëroi përkohësisht qeverinë që ta përfshijë Pavelin në delegacion, ndërsa shqyrton padinë kushtetuese të ngritur prej tij.

Përplasja nisi pasi qeveria miratoi përbërjen e delegacionit pa emrin e presidentit, duke argumentuar se qëndrimet e tij për politikën e mbrojtjes ndryshojnë nga ato të kabinetit dhe se drejtimi i politikës ekzekutive i takon qeverisë.

Ministri i Jashtëm, Petr Macinka, e kritikoi vendimin e gjykatës, duke e cilësuar si një “tentativë për grusht shteti kushtetues”. Megjithatë, ai konfirmoi se qeveria do ta respektojë vendimin e përkohshëm dhe do ta akreditojë presidentin, ndërsa këmbënguli se kryeministri Andrej Babis do të mbetet drejtuesi i delegacionit.

Macinka bëri të ditur se qeveria do të vendosë javën e ardhshme për rolin përfundimtar të Pavelit gjatë samitit. Ndërkohë, politikani Filip Turek akuzoi Gjykatën Kushtetuese për mungesë paanshmërie dhe kërkoi shfuqizimin e saj.

Në një intervistë për Seznam Zpravy, Pavel tha se kjo përplasje e ka forcuar vendosmërinë e tij për të kandiduar për një mandat të dytë presidencial në vitin 2028, nëse do të vazhdojë të ketë mbështetje të gjerë publike dhe do të gëzojë shëndet të mirë.

Presidenti çek pretendoi se konflikti lidhet me hakmarrjen e ministrit Macinka, pasi ai refuzoi të emëronte Filip Turek si ministër. Sipas Pavelit, edhe kryeministri Babis zgjodhi përballjen me presidencën për të ruajtur unitetin e koalicionit qeverisës.