Merz bën thirrje për negociata të menjëhershme: Ka ardhur koha të ndalen vrasjet në Ukrainë

Kancelari gjerman Friedrich Merz bëri thirrje për nisjen e menjëhershme të negociatave për t’i dhënë fund luftës në Ukrainë, duke deklaruar se ka ardhur momenti për të ndalur gjakderdhjen dhe për të hapur rrugën drejt paqes.

Duke folur në Konferencën për Rindërtimin e Ukrainës, që po zhvillohet në Gdańsk të Polonisë, Merz theksoi se Evropa dhe aleatët transatlantikë mbeten të vendosur të rrisin presionin ekonomik ndaj Rusisë, ndërsa përsëriti se Moska nuk do ta fitojë këtë luftë.

“Ka ardhur koha për të ndalur vrasjet”, deklaroi kancelari gjerman, duke shtuar se tani ekzistojnë kushtet për të nisur negociata, për të ngrirë vijën e frontit dhe për t’i dhënë fund konfliktit.

Merz ritheksoi se Gjermania do të vazhdojë të mbështesë Ukrainën për aq kohë sa të jetë e nevojshme.

“Mbështetja jonë për Ukrainën mbetet e palëkundur. Ne do të vazhdojmë të qëndrojmë në krah të Kievit, i cili prej më shumë se katër vitesh po përballet me agresionin rus”, tha ai.

Kancelari pranoi se përpjekjet e mëparshme për arritjen e paqes, të ndërmjetësuara nga Shtetet e Bashkuara, nuk kanë prodhuar rezultate konkrete. Për këtë arsye, sipas tij, vendet kryesore evropiane po kërkojnë të luajnë një rol më aktiv në rifillimin e procesit negociues.

Nga ana tjetër, Rusia vazhdon të refuzojë negociatat me vendet evropiane dhe këmbëngul në kërkesat e saj, përfshirë lëshime të konsiderueshme territoriale nga Ukraina, kushte që janë refuzuar vazhdimisht nga Kievi.

Konferenca për Rindërtimin e Ukrainës u organizua nga kryeministri i Polonisë, Donald Tusk, dhe kryeministrja e Ukrainës, Yulia Svyrydenko. Në të morën pjesë liderë politikë, përfaqësues të Bashkimit Evropian, vendeve të G7, Bankës Botërore dhe përfaqësues të biznesit ndërkombëtar, me fokus mbështetjen financiare dhe rindërtimin e Ukrainës.