Përshkallëzimi i konfliktit në Iran dhe mbyllja e Ngushticës së Hormuzit po rrisin ndjeshëm rrezikun e një krize ushqimore globale, ka paralajmëruar Programi Botëror i Ushqimit (WFP).

Drejtori Ekzekutiv në detyrë i organizatës, Carl Skau, deklaroi se bllokimi i një prej korridoreve më të rëndësishme detare në botë ka sjellë rritje të menjëhershme të kostove të karburantit, duke ndikuar drejtpërdrejt në çmimet e ushqimeve dhe operacionet humanitare.

Sipas Skau, dërgesat e ndihmave janë bërë më të kushtueshme, ndërsa furnizimet me plehra bujqësore drejt vendeve të varfra, përfshirë Sudanin, janë penguar ndjeshëm.

“Kur çmimet e ushqimeve rriten me 20-30%, njerëzit hanë 20-30% më pak”, tha ai, duke paralajmëruar për pasoja të menjëhershme për familjet më të varfra në botë.

Situata po rëndohet edhe nga mungesa e fondeve për organizatat humanitare. WFP ka raportuar një rënie të konsiderueshme të donacioneve ndërkombëtare, përfshirë ato nga Shtetet e Bashkuara, donatori më i madh i programit.

Organizata kishte paralajmëruar më herët se deri në 45 milionë persona shtesë mund të përballen me uri akute nëse çmimi i naftës mbetet mbi 100 dollarë për fuçi për një periudhë të zgjatur.

Sipas Programit Botëror të Ushqimit, edhe në rast se Ngushtica e Hormuzit rihapet në ditët apo javët në vijim, pasojat ekonomike dhe humanitare të krizës pritet të vazhdojnë të ndihen për një kohë të gjatë në shumë vende të botës.