Qeveria: Rritet dëmshpërblimi për ish-të përndjekurit, zgjerohen bashkitë në “Paketën e Maleve”
Ministri i Financave i Shqipëria, Petrit Malaj, dhe Ministri i Shtetit për Pushtetin Vendor, Ervin Demo, kanë bërë publike vendimet e fundit të marra në mbledhjen e qeverisë.
Sipas Malajt, një nga vendimet kryesore lidhet me rritjen dhe përshpejtimin e procesit të dëmshpërblimit për ish-të përndjekurit politikë.
“Miratuam një ndryshim që lidhet me dëmshpërblimin e ish-të përndjekurve politikë… kemi marrë vendimin që për të gjitha ato pagesa që janë deri në 1 milionë lekë, do të bëhen pagesat me këstin e radhës… synojmë që brenda 4-5 viteve të bëjmë shlyerjen e plotë të 6 mijë dosjeve,” deklaroi Malaj.
Ai shtoi se ndryshimet do të përshpejtojnë procesin e pagesave dhe do të kërkojnë rritje të fondit vjetor për këtë kategori.
Ndërkohë, ministri Ervin Demo njoftoi zgjerimin e “Paketës së Maleve” me tre bashki të reja: Delvinë, Konispol dhe Pogradec.
“Sapo kemi miratuar tre bashki të reja për Paketën e Maleve… brenda majit do të kemi përfunduar me të gjitha bashkitë,” u shpreh Demo.
Sipas tij, procesi i aplikimeve nga qytetarët në shumicën e bashkive ka avancuar dhe pritet të përmbyllet në javët në vijim.
