Çmimi i naftës mbetet i lartë pavarësisht zgjatjes së armëpushimit nga Trump
Çmimet e naftës mbetën të larta edhe pas njoftimit të presidentit amerikan, Donald Trump për zgjatjen e armëpushimit me Iranin, ndërsa tregjet nuk kanë dhënë shenja të qetësimit të tensioneve.
Nafta “Brent” për dorëzim në qershor u rrit përkohësisht mbi 100 dollarë për fuçi për herë të parë pas rreth një jave, përpara se të arrinte 99 dollarë, duke mbetur gjithsesi rreth 4% më e lartë gjatë ditës.
Ndërkohë, nafta amerikane “West Texas Intermediate” shënoi një rritje më të moderuar.
Më herët, Trump deklaroi se SHBA-ja do të përmbahej nga sulmet e mëtejshme me kërkesë të Pakistanit, duke i dhënë kohë udhëheqjes iraniane të paraqiste një propozim të unifikuar për negociatat.
Pa këtë zgjatje, armëpushimi do të përfundonte sot, ndërsa Trump paralajmëroi për sulme të rënda ndaj sektorit energjetik dhe infrastrukturës civile të Iranit.
Megjithatë, perspektivat për përparim në negociata mbeten të kufizuara.
Uashingtoni dhe Teherani nuk kanë arritur ende të bien dakord për një raund të dytë bisedimesh, pavarësisht përpjekjeve ndërmjetësuese nga ana e Pakistanit, të cilat Trump i theksoi në njoftimin e tij.
Shtetet e Bashkuara te Amerikës synojnë gjithashtu të ruajnë bllokadën ndaj tregtisë detare iraniane, një veprim që Teherani e konsideron si pengesë për rifillimin e diplomacisë.
Bllokada e SHBA-së synon linjat kryesore të të ardhurave të Iranit
Sekretari amerikan i Thesarit, Scott Bessent tha dje në mbrëmje se bllokada e vazhdueshme e tregtisë detare të Iranit po e dobëson rëndë fuqinë ekonomike të Teheranit.
“Objektet e magazinimit në ishullin Kharg, një qendër kyçe për tregtinë e naftës, do të jenë plot dhe puset e brishta iraniane të naftës do të mbyllen”, shkroi Bessent në X.
“Kufizimi i tregtisë detare të Iranit synon drejtpërdrejt linjat kryesore të të ardhurave të regjimit”, shtoi ai.
Deklarata e Bessent erdhi pasi presidenti i SHBA-së, Donald Trump njoftoi po e zgjaste armëpushimin me Iranin. Megjithatë, ai tha se bllokada detare do të mbetej në fuqi.
Bllokada prek anijet që vijnë nga ose drejtohen për në portet iraniane.
Kharg është terminali më i rëndësishëm i eksportit për naftën bruto iraniane, në Gjirin Persik. Një pjesë e madhe e prodhimit të naftës transportohet prej andej.
Gjatë luftës Iran-Irak 1980-1988, Kharg u shënjestrua vazhdimisht për shkak të rëndësisë së tij strategjike.
SHBA-ja sanksionon rrjetin që furnizon Iranin me programe raketash dhe dronësh
SHBA-ja ka vendosur sanksione ndaj një rrjeti ndërkombëtar të akuzuar për furnizimin e armëve dhe komponentëve për Iranin, tha dje Departamenti Amerikan i Thesarit.
Masat synojnë 14 individë, kompani dhe avionë, duke përfshirë aktorë me bazë në Iran, Turqi dhe Emiratet e Bashkuara Arabe, të dyshuar se janë të përfshirë në furnizimin ose transportimin e materialeve për programet e raketave dhe dronëve të Iranit.
Departamenti Amerikan i Thesarit tha se rrjeti u përqendrua pjesërisht në komponentët e dronëve dhe materialet pararendëse të përdorura në prodhimin e karburantit të raketave.
Linja ajrore iraniane “Mahan Air”, e cila më herët është shënjestruar nga autoritetet amerikane, luan një rol qendror.
Sipas Departamentit Amerikan të Thesarit, aiakuzohet për përfshirje në transportimin e armëve dhe sistemeve të dronëve. Disa individë dhe kompani të lidhura me linjën ajrore u sanksionuan gjithashtu.
Masa është pjesë e fushatës së Uashingtonit “Tërbimi Ekonomik” që synon frenimin e aftësive ushtarake të Iranit.
Sekretari amerikan i Thesarit, Scott Bessent tha në X se qeveria iraniane duhet të vendoset përballë përgjegjësise për “zhvatjen e tregjeve globale të energjisë” dhe sulmet ndaj civilëve duke përdorur raketa dhe dronë.
