Eurodeputetja shqiptare në Strasburg, Arba Kokalari, e cila përfaqëson Suedinë në Parlamentin Europian, ka folur për EUNEWS mbi lidhjen e saj me Shqipërinë dhe mbi ecurinë e vendit drejt anëtarësimit në Bashkimin Europian.
“Unë jam zgjedhur nga Suedia si eurodeputete e Partisë Moderaterna, por kam lindur në Tiranë,” – tha Kokalari për EUNEWS.
Ajo theksoi se origjina shqiptare është pjesë e pandarë e identitetit të saj dhe e ndihmon ta kuptojë më mirë realitetin shqiptar.
“Jam edhe shqiptare dhe kam eksperiencë e botëkuptim për shqiptarët dhe sfidat që ata kanë përjetuar brenda në Shqipëri. Edhe ne si diasporë, patjetër, kemi një perspektivë që unë e mbaj me vete në punën time,” – shtoi ajo.
Eurodeputetja tha se në aktivitetin e saj politik në BE, përpiqet t’u shpjegojë kolegëve europianë situatën në Shqipëri dhe jetën e shqiptarëve në vende të ndryshme të Europës:
“Sidomos për t’ua shpjeguar kolegëve të mi në Bashkimin Europian se çfarë ndodh në Shqipëri, si është situata dhe si jetojnë shqiptarët që banojnë në shtete të ndryshme.”
Sa i përket reformave dhe procesit të integrimit europian, Kokalari shprehet optimiste:
“Unë shoh që Shqipëria po bën shumë reforma. Do ta shihni shumë shpejt që do të futet në BE, dhe ky është një moment historik.”
Ajo nënvizoi se zgjerimi i BE-së drejt Ballkanit është i rëndësishëm për stabilitetin e kontinentit:
“Ky është një shans shumë i mirë për Shqipërinë, por është i rëndësishëm edhe për BE-në, sepse tregon që mund të kemi stabilitet edhe brenda BE-së kur shtetet e Ballkanit të bëhen pjesë e familjes sonë.”
Në përmbyllje, Kokalari tha se, pavarësisht se përfaqëson Suedinë, lidhja me Shqipërinë mbetet e pathyeshme:
“Unë jam e zgjedhur nga Suedia dhe mbroj interesat e saj në BE, por patjetër që gjithmonë jam edhe shqiptare nga zemra.”
