Kryeministri Edi Rama deklaroi se është neutralizuar një sulm me dron me eksploziv ndaj Kryeministrisë, gjatë situatës së krijuar nga protestat në Tiranë.
Në takimin me përfaqësues të sektorit bankar, Rama tha se autoritetet kishin pasur informacion për skenarë të rëndë, përfshirë përpjekje për të provokuar një ngjarje të ngjashme me 21 Janarin.
“Kemi pasur informacion edhe për mundësinë e skenarëve më të këqinj, për të provokuar një tjetër 21 Janar, për ta provokuar policinë, për të reaguar në mënyrë disproporcionale”, u shpreh ai.
Kryeministri nuk dha në deklaratën e cituar hollësi mbi kohën, autorët e dyshuar apo hetimet për sulmin me dron.
Duke mbrojtur veprimet e Policisë së Shtetit, Rama tha se efektivët kanë mbajtur qëndrim mbrojtës dhe se situata përbën një test për institucionet.
“Kemi qenë të vetëdijshëm që në ditën e parë se do të jetë një sfidë e madhe dhe një test i madh karakteri dhe dinjiteti për shtetin”, deklaroi ai.
Rama u kërkoi pjesëmarrësve paqësorë të distancohen nga personat që kryejnë akte dhune, ndërsa paralajmëroi pasoja ligjore edhe për ata që, sipas tij, u ofrojnë mbulim.
“Kush ankohet se ishte atje paqësisht, duhet të distancohet”, tha kryeministri.
Ai kritikoi gjithashtu akuzat publike për përdorim disproporcional të forcës nga policia. Personat e maskuar të përfshirë në përplasje i përshkroi si të rinj të manipuluar dhe të braktisur.
Në përfundim, Rama deklaroi se dhuna nuk do të lejohet të pengojë institucionet dhe funksionimin normal të vendit.
