Shërbimi britanik i inteligjencës së brendshme, MI5, ka paralajmëruar se zhvillimi i shpejtë i inteligjencës artificiale mund të krijojë kërcënime të reja për sigurinë kombëtare, përfshirë mundësinë që organizatat terroriste ta përdorin këtë teknologji për të zhvilluar armë biologjike.
Drejtori i përgjithshëm i MI5, Ken McCallum, njoftoi të martën krijimin e një qendre të posaçme për vlerësimin e kërcënimeve nga inteligjenca artificiale, e cila do të ndihmojë qeverinë britanike të identifikojë dhe të përgatitet për rreziqet e ardhshme.
Gjatë raportimit të tij vjetor nga selia e MI5 në Londër, McCallum paralajmëroi se inteligjenca artificiale po ndryshon me shpejtësi natyrën e kërcënimeve ndaj sigurisë.
“Historia njerëzore nuk na ka dhënë përvojë në përballjen me një aktor që është më inteligjent se ne dhe i aftë të na tejkalojë në mendim”, deklaroi ai.
MI5: Terroristët po përpiqen të shfrytëzojnë inteligjencën artificiale
Sipas McCallum, shërbimet britanike të sigurisë kanë identifikuar raste kur persona të përfshirë në aktivitete terroriste kanë tentuar të përdorin inteligjencën artificiale për të përmirësuar planifikimin dhe metodat e sulmeve.
Ai paralajmëroi gjithashtu për rreziqet që lidhen me përdorimin e dronëve të kontrolluar ose të ndihmuar nga inteligjenca artificiale.
Megjithatë, shqetësimi më i madh i kreut të MI5 lidhet me mundësinë që kjo teknologji të lehtësojë aksesin në njohuri të rrezikshme për zhvillimin e armëve biologjike.
McCallum theksoi se një rrezik i tillë ende nuk është materializuar, por kërkon vëmendje të veçantë nga autoritetet.
Sipas tij, nëse mekanizmat e sigurisë së sistemeve të inteligjencës artificiale nuk funksionojnë siç duhet, edhe individë me aftësi të kufizuara teknike mund të fitojnë njohuri që më parë ishin të vështira për t’u siguruar.
Ai ngriti gjithashtu shqetësimin se inteligjenca artificiale mund të përdoret për krijimin e patogjenëve të rinj, duke theksuar se qeveria britanike po ndërmerr masa shtesë për përballimin e kërcënimeve biologjike.
Britania krijon qendrën e re kundër kërcënimeve nga AI
Qendra e re, e quajtur AI Threat Assessment Centre (AITAC), do të bashkojë ekspertë nga MI5, Instituti Britanik për Sigurinë e Inteligjencës Artificiale, Agjencia Kombëtare Kundër Krimit dhe Qendra Kombëtare e Sigurisë Kibernetike.
Detyra e saj do të jetë analizimi i kërcënimeve të reja, dallimi i rreziqeve reale nga pretendimet e ekzagjeruara dhe ofrimi i një vlerësimi të përbashkët për institucionet shtetërore.
Vendimet për masat konkrete do të mbeten përgjegjësi e qeverisë britanike.
McCallum njoftoi gjithashtu se MI5 do t’i japë përparësi më të madhe mbrojtjes së infrastrukturës kritike, përballimit të kërcënimeve teknologjike dhe luftës kundër manipulimit të informacionit.
Ai bëri të ditur se shërbimi britanik po angazhon aktualisht më shumë burime për përballimin e kërcënimeve nga shtetet e huaja sesa gjatë Luftës së Ftohtë.
Sipas kreut të MI5, përparimi i shpejtë i inteligjencës artificiale po i detyron shërbimet e sigurisë të përshtaten me një ritëm shumë më të lartë për të parandaluar rreziqet e ardhshme.
