Trump mbledh më 30 qershor “Bordin e Paqes” për Gazën, synohet rishikimi i strategjisë pas luftës me Iranin
Presidenti amerikan Donald Trump do të mbledhë më 30 qershor në Qipro “Bordin e Paqes për Gazën”, në një përpjekje për të rishikuar strategjinë e administratës amerikane për të ardhmen e Rripit të Gazës.
Sipas burimeve të cituara nga Politico, takimi do të zgjasë dy deri në tre ditë dhe synon të rikthejë vëmendjen te Gaza, pasi zhvillimet dhe tensionet mes SHBA-së, Izraelit dhe Iranit kanë dominuar axhendën ndërkombëtare muajt e fundit.
Në mbledhje pritet të marrin pjesë përfaqësues të Komitetit Kombëtar për Administrimin e Gazës, një strukturë teknokratësh palestinezë që synon të zëvendësojë Hamasin në qeverisjen e territorit, si dhe përfaqësues të zyrës së Nikolay Mladenov, ish-diplomatit bullgar të emëruar nga Trump si përfaqësues i lartë për Gazën.
Sipas zyrtarëve europianë të përfshirë në organizimin e takimit, qëllimi është një “rifillim” i procesit politik dhe administrativ për Gazën, pas ngadalësimit të iniciativës për shkak të problemeve financiare, sfidave logjistike dhe debateve mbi legjitimitetin ndërkombëtar të projektit.
Bordi i Paqes për Gazën u krijua nga administrata Trump për të mbikëqyrur rindërtimin dhe administrimin e territorit pas luftës. Takimi i parë u zhvillua në muajin shkurt, por deri tani progresi ka qenë i kufizuar.
Ndërkohë, situata humanitare në Gaza mbetet e rëndë. Konflikti nisi pas sulmit të Hamasit ndaj Izraelit më 7 tetor 2023, ku humbën jetën rreth 1,200 persona dhe u morën peng 251 të tjerë. Operacioni ushtarak izraelit që pasoi ka shkaktuar dhjetëra mijëra viktima palestineze dhe zhvendosjen e shumicës së popullsisë së Gazës.
Armëpushimi i ndërmjetësuar nga administrata Trump në tetor 2025 çoi në lirimin e 20 pengjeve të fundit izraelite, por përpjekjet për stabilizimin dhe rindërtimin e Gazës vijojnë të përballen me sfida të shumta politike dhe financiare.
