SHBA financon riparimin e Çernobilit, Zelensky: Ndihmë vendimtare për sigurinë bërthamore
Presidenti i Ukrainës, Volodymyr Zelensky, ka bërë të ditur se Shtetet e Bashkuara të Amerikës do të kontribuojnë me 100 milionë dollarë për riparimin e strukturës mbrojtëse mbi reaktorin e dëmtuar në centralin bërthamor të Çernobilit.
Në një reagim në platformën X, Zelensky e cilësoi këtë vendim si një hap të rëndësishëm mbështetjeje nga Uashingtoni, duke shprehur mirënjohjen e tij për angazhimin financiar në një projekt që lidhet drejtpërdrejt me sigurinë ndërkombëtare bërthamore.
Sipas tij, kostoja totale e ndërhyrjeve të nevojshme në strukturën mbrojtëse vlerësohet mbi 500 milionë euro (rreth 583 milionë dollarë), pasi vitin e kaluar një dron rus dëmtoi harkun prej çeliku që mbulon reaktorin e shkatërruar. Autoritetet ukrainase po punojnë me partnerët ndërkombëtarë për sigurimin e fondeve të mbetura.
Çernobili mbetet një nga simbolet më të mëdha të katastrofës bërthamore globale. Më 26 prill 1986, një test sigurie në reaktorin e centralit, atëherë pjesë e Bashkimit Sovjetik, doli jashtë kontrollit, duke shkaktuar aksidentin më të rëndë bërthamor në histori. Rrezatimi u përhap në pjesë të mëdha të Evropës Veriore dhe Perëndimore.
Ndërsa këtë vit u shënua 40-vjetori i tragjedisë, lufta në Ukrainë ka rikthyer shqetësimet për sigurinë e zonës, duke e bërë ndërhyrjen në infrastrukturën mbrojtëse edhe më urgjente.
