Rama dënon sulmin në SHBA: Akt që godet lirinë dhe demokracinë
Kryeministri Edi Rama reagoi sot ndaj një incidenti të rëndë të ndodhur në Washington D.C., duke e cilësuar sulmin me armë gjatë një aktiviteti presidencial si tronditës dhe të papranueshëm.
Në një deklaratë publike, Rama dënoi ashpër aktin e dhunës, duke theksuar se sulme të tilla cenojnë drejtpërdrejt lirinë dhe vlerat demokratike. Ai u shpreh i lehtësuar që Donald Trump dhe të gjithë pjesëmarrësit në aktivitet janë në gjendje të mirë shëndetësore.
Ngjarja ndodhi në ambientet e hotelit Washington Hilton, ku po organizohej një aktivitet presidencial me praninë e gazetarëve dhe zyrtarëve të lartë. Sipas raportimeve, një person i armatosur shkaktoi alarm, duke detyruar autoritetet të ndërhyjnë menjëherë.
Presidenti amerikan nuk pësoi lëndime, ndërsa disa prej drejtuesve më të lartë u evakuuan nga darka vjetore e korrespondentëve të Shtëpisë së Bardhë, pas sinjalizimit për të shtëna me armë jashtë sallës së banketit.
Autoritetet amerikane reaguan me shpejtësi për të neutralizuar situatën dhe për të garantuar sigurinë e të pranishmëve, ndërsa hetimet për zbardhjen e plotë të rrethanave vijojnë.
