Pakistan mirëpret gjestin e SHBA-së/ Evakuohen 22 marinarë nga anija iraniane në Ngushticën e Hormuzit

Pakistani ka mirëpritur vendimin e Shteteve të Bashkuara për të dorëzuar 22 anëtarë të ekuipazhit, të cilët mbaheshin në bordin e një anijeje iraniane të sekuestruar, në një përpjekje për të ndërtuar besim mes palëve në mes të tensioneve në Lindjen e Mesme.

Ministria e Jashtme pakistaneze njoftoi se anëtarët e ekuipazhit, të mbajtur në anijen iraniane të kontejnerëve MV Touska, janë evakuuar dhe transportuar drejt Pakistanit.

“Si një masë ndërtimi besimi nga Shtetet e Bashkuara të Amerikës, 22 anëtarë të ekuipazhit janë evakuuar në Pakistan. Pakistani mirëpret masa të tilla dhe do të vazhdojë të lehtësojë dialogun dhe diplomacinë”, thuhet në deklaratë.

Sipas autoriteteve, ekuipazhi mbërriti me avion në Pakistan mbrëmjen e djeshme dhe pritet t’u dorëzohet autoriteteve iraniane.

Anija iraniane ishte goditur nga forcat amerikane më 19 prill, pasi kishte refuzuar të ndalonte dhe kishte vijuar lëvizjen përmes Ngushticës së Hormuzit, pavarësisht bllokadës në zonë.

Ndërkohë, tensionet mes SHBA-së, Izraelit dhe Iranit mbeten të larta, edhe pse një armëpushim i përkohshëm është në fuqi. Ngushtica e Hormuzit vijon të jetë një pikë kyçe e përplasjes, duke ndikuar drejtpërdrejt në tregjet globale të energjisë.

Bisedimet e para mes palëve janë zhvilluar në Islamabad, por pa arritur përparim konkret, ndërsa pritet mundësia e një raundi të dytë negociatash.