Osmani hap fushatën në Prishtinë: thirrje për bashkim dhe kritikë ndaj polarizimit politik
Me një fjalim të gjatë dhe të ngarkuar emocionalisht, kandidatja presidenciale e LDK-së, Vjosa Osmani, ka hapur zyrtarisht fushatën për zgjedhjet e 7 qershorit, duke u fokusuar te mesazhi i bashkimit kombëtar dhe orientimit euroatlantik të Kosovës.
Para mijëra mbështetësve në Prishtinë dhe ndjekësve në diasporë, Osmani e ndërtoi fjalimin e saj rreth thirrjes “Bashkohuni”, duke e cilësuar këtë jo si një mesazh partie, por si thirrje për gjithë shtetin.
Ajo kritikoi ashpër kulturën e polarizimit politik, duke thënë se Kosova ka nevojë për një qasje të re që i jep fund përçarjeve dhe konflikteve të brendshme politike.
Osmani e paraqiti trashëgiminë politike të Ibrahim Rugovës si një model modern për shtetin e Kosovës, duke theksuar se “Rugovizmi nuk është e kaluar, por vizion për të ardhmen”.
Në fjalimin e saj, ajo ritheksoi orientimin euroatlantik të Kosovës dhe aleancën me Shtetet e Bashkuara, duke e cilësuar këtë si një zgjedhje strategjike dhe historike të vendit.
Ajo premtoi ndërtimin e një shteti institucional dhe jo të varur nga individët, ndërsa kritikoi situatën aktuale sociale dhe emigrimin e të rinjve.
Fushata u mbyll me një thirrje për rikthim te LDK-ja si forcë e shtetformimit dhe stabilitetit politik në vend.
