Netanyahu: Uraniumi i pasuruar i Iranit duhet “hequr” përpara përfundimit të luftës

Kryeministri i Izraelit, Benjamin Netanyahu, ka deklaruar se rezervat e uraniumit të pasuruar në Iran duhet të “hiqen” përpara se konflikti me SHBA-në dhe Izraelin nga njëra anë, dhe Teheranin nga ana tjetër, të konsiderohet i mbyllur.

Në një intervistë për emisionin “60 Minutes” në CBS News, Netanyahu theksoi se situata aktuale nuk mund të quhet e përfunduar për sa kohë Irani vazhdon të ketë në dispozicion materiale bërthamore dhe kapacitete për pasurimin e uraniumit.

“Lufta nuk ka mbaruar, sepse ende ka material bërthamor, uranium të pasuruar, që duhet të hiqet nga Irani. Ende ka vende pasurimi që duhet të çmontohen”, u shpreh ai.

I pyetur mbi mënyrën se si mund të realizohet kjo, Netanyahu dha një përgjigje të drejtpërdrejtë: “Ju ndërhyni dhe hiqeni atë”.

Deklaratat e tij vijnë në një moment tensionesh të larta në Lindjen e Mesme, ndërsa shqetësimet ndërkombëtare mbi programin bërthamor iranian vijojnë të mbeten në qendër të debatit diplomatik dhe të sigurisë globale.