“Mora mesazh nga lideri suprem i Iranit”, Vladimir Putin flet pas takimit me ministrin iranian: Rusia mbështet sovranitetin e Teheranit

Presidenti rus, Vladimir Putin, deklaroi se javën e kaluar ka marrë një mesazh nga Udhëheqësi Suprem i Iranit, Mojtaba Khamenei, i cili nuk është parë apo dëgjuar në publik që prej shpalljes si pasardhës i babait të tij më shumë se gjashtë javë më parë.

“Ju lutem përcillni Udhëheqësit Suprem vlerësimin tim për mesazhin e tij dhe urimet e mia më të mira për shëndet dhe mirëqenie”, tha Putin të hënën gjatë një takimi në Shën Petersburg me Ministrin e Jashtëm iranian, Abbas Araghchi, sipas një deklarate të Kremlinit.

“Ne shohim se sa me guxim dhe heroikisht po lufton populli iranian për pavarësinë dhe sovranitetin e tij”, shtoi ai, duke theksuar se Rusia do të bëjë gjithçka në interes të paqes dhe stabilitetit në rajon.

Nga ana e tij, Abbas Araghchi deklaroi se Teherani e mirëpret mbështetjen e Moskës për përpjekjet diplomatike të deeskalimit, duke nënvizuar “stabilitetin dhe thellësinë” e marrëdhënieve mes dy vendeve.

“Jemi të kënaqur që po bashkëpunojmë me Rusinë në nivelin më të lartë, në një kohë kur rajoni po përballet me zhvillime të rëndësishme. Ngjarjet e fundit kanë treguar qartë forcën e partneritetit tonë strategjik”, u shpreh ai.

Zhvillimet vijnë në një moment delikat për Iranin, pasi mungesa e gjatë në publik e Mojtaba Khamenei ka ngritur dyshime për gjendjen e tij shëndetësore dhe rolin real në drejtimin e vendit.

Sipas burimeve ndërkombëtare, ekzistojnë pretendime se ai mund të jetë plagosur gjatë një vale sulmesh që goditi strukturat e larta iraniane, ndërsa zyrtarë amerikanë kanë dhënë sinjale të paqarta mbi situatën.

Marco Rubio deklaroi se SHBA ka indikacione që lideri iranian është ende gjallë, por theksoi se mbetet e paqartë nëse ai ka kontroll të plotë mbi vendimmarrjen.

“Nuk kemi prova se ai nuk është gjallë. Por nëse është në pushtet dhe sa ndikim ka realisht, janë dy çështje të ndryshme”, u shpreh ai.

Ndërkohë, raportime të tjera sugjerojnë se Mojtaba Khamenei vazhdon të marrë pjesë në vendime të rëndësishme përmes komunikimeve në distancë me zyrtarë të lartë, përfshirë çështje që lidhen me luftën dhe negociatat e mundshme me Shtetet e Bashkuara.

Në këtë kontekst, deklaratat e Putinit dhe theksimi i mbështetjes ndaj Iranit tregojnë jo vetëm forcimin e marrëdhënieve mes Moskës dhe Teheranit, por edhe përpjekjet për të ndikuar në balancat gjeopolitike në një rajon që mbetet në tension të lartë.