Kallas: Europa duhet të forcojë rolin në NATO mes sinjaleve për tërheqje të trupave amerikane
Shefja e politikës së jashtme të Bashkimi Europian, Kaja Kallas, deklaroi se një tërheqje e mundshme e trupave amerikane nga Europa brenda 6–12 muajve është “e papritur”, duke theksuar nevojën për një rol më të fortë europian në NATO.
Duke folur në samitin e Komunitetit Politik Europian në Jerevan, Kallas tha se diskutimet për një tërheqje të tillë kanë ekzistuar prej kohësh, por momenti i njoftimit ka ardhur si surprizë.
Ajo theksoi se kjo situatë duhet të shërbejë si një sinjal për Europën që të “forcojë ndjeshëm shtyllën europiane brenda NATO-s” dhe të marrë më shumë përgjegjësi për sigurinë e saj.
“Trupat amerikane janë në Europë jo vetëm për të mbrojtur interesat europiane, por edhe ato amerikane”, u shpreh Kallas.
Komentet e saj vijnë pas njoftimeve nga Pentagoni për reduktimin e pranisë ushtarake në Gjermani, ku pritet të tërhiqen rreth 5.000 trupa. Ky zhvillim lidhet me tensionet në rritje mes Shtetet e Bashkuara dhe aleatëve europianë, përfshirë çështje si lufta me Iranin dhe politikat tregtare.
Ajo shtoi se mungesa e një përfaqësuesi amerikan në takim e bëri të pamundur sqarimin e qëndrimit të administratës së Donald Trump.
Kallas nënvizoi gjithashtu rëndësinë strategjike të rajonit të Kaukazit, duke theksuar se zhvillimet e fundit në Lindjen e Mesme rrisin nevojën për diversifikimin e rrugëve tregtare. Ajo e cilësoi Korridorin e Mesëm si një alternativë “jashtëzakonisht të rëndësishme” për lidhshmërinë dhe sigurinë ekonomike.
Në fund, ajo u ndal edhe te Armenia, duke theksuar se perspektiva europiane e vendit mbetet një vendim që i takon vetë qytetarëve armenë në prag të zgjedhjeve të ardhshme.
