Ivanka Trump për investimin në Sazan: U magjepsëm që ditën e parë, duam të krijojmë diçka të jashtëzakonshme
Ivanka Trump ka ndarë detaje të reja mbi investimin turistik që po zhvillon së bashku me bashkëshortin e saj në ishullin e Sazanit, duke e cilësuar projektin si kulmin e përvojës së saj në fushën e pasurive të paluajtshme dhe një vizion personal për mënyrën e jetesës në të ardhmen.
Në podkastin e David Senra, me titull “Ivanka Trump on Building an Authentic Life”, vajza e presidentit amerikan tregoi se zbulimi i ishullit ndodhi rastësisht gjatë një udhëtimi me jaht në Mesdhe.
“Është një ishull privat i pabesueshëm, i bukur, me sipërfaqe 1.400 hektarë, në mes të Mesdheut. Ishim në jahtin e një miku dhe u ndalëm për të notuar. Në fakt, kështu e gjetëm. Notuam deri në ishull. Ecëm zbathur deri në majë dhe thjesht u magjepsëm; dhe ai vend ka mbetur në mendjet tona që prej asaj kohe”, tha Ivanka Trump.
Ajo sqaroi se mundësia për investim erdhi vetëm pas disa vitesh dhe se projekti po zhvillohet me kujdes të veçantë për të respektuar natyrën e zonës.
“Gjatë shumë viteve, ne krijuam mundësinë për të ndihmuar në realizimin e potencialit të tij dhe për ta transformuar, por me shumë përmbajtje dhe kujdes, sepse toka është aq e bukur, saqë arkitektura duhet të integrohet plotësisht në të, pothuajse të ngrihet prej saj”, u shpreh ajo.
Sipas Ivanka Trump, projekti nuk përfaqëson vetëm një investim ekonomik, por një sfidë personale dhe profesionale.
“Për mua kjo nuk është as një biznes, pavarësisht përmasës së tij. Ne kemi jo vetëm ishullin, por edhe pesë milje vijë bregdetare përballë tij. Një gadishull i bukur me një lagunë në njërën anë, oqeanin në anën tjetër dhe plazhe të bukura me rërë të bardhë. Për mua, kjo ndihet më shumë si një sfidë se çdo gjë tjetër. Është kulmi i gjithë përvojës sime në pasuritë e paluajtshme, i të gjitha udhëtimeve të mia dhe i shumë reflektimeve mbi mënyrën se si dua të jetoj”, deklaroi ajo.
Trump theksoi se projekti po realizohet me ndihmën e disa prej arkitektëve më të njohur në botë dhe se synimi është krijimi i një zhvillimi që harmonizohet plotësisht me natyrën.
“Kjo kërkon shumë vizion. Kërkon bashkëpunimin e disa prej mjeshtërve më të mëdhenj që ekzistojnë. Sapo isha atje duke ecur nëpër tokë, së bashku me disa nga arkitektët më të mëdhenj të gjallë të kohës sonë, mjeshtër të vërtetë të zanatit të tyre. Njerëz me integritet kaq absolut, saqë nuk do të ketë asnjë kompromis. Dhe kjo është diçka që ne duam të krijojmë atje. Prandaj jemi shumë të emocionuar”, tha ajo.
Duke folur për filozofinë që qëndron pas projektit, Ivanka Trump vlerësoi rëndësinë e ruajtjes së standardeve të larta dhe të moskomprometimit të vizionit krijues.
“Kur punon me artistë të vërtetë, pavarësisht mediumit të tyre, qoftë një telajo, pasuritë e paluajtshme, një shtëpi apo muzika, ata nuk bëjnë kompromis. Integriteti i tyre është i saktë. Dhe ata do ta shtyjnë veten përtej kufijve. Do t’i shtyjnë edhe të gjithë njerëzit rreth tyre”, përfundoi ajo.
