Irani paraqet plan me 14 pika ndaj SHBA-së, tensionet mbeten të larta
Irani ka njoftuar se i është përgjigjur listës pesëpikëshe të paraqitur më herët nga Shtetet e Bashkuara, duke dorëzuar një propozim të ri me 14 pika përmes Pakistanit.
Sipas burimeve pranë negociatave, plani i ri i Teheranit fokusohet kryesisht në përfundimin e luftës, ndërsa mbron edhe kërkesat kryesore të tij, përfshirë zhbllokimin e pasurive të ngrira jashtë vendit dhe heqjen e sanksioneve afatgjata.
Po ashtu, autoritetet iraniane kërkojnë dëmshpërblim për dëmet e luftës, duke e cilësuar konfliktin si “të paligjshëm dhe të pabazuar”. Nga ana tjetër, SHBA-ja ka refuzuar lirimin e pasurive dhe ka theksuar se armiqësitë do të ndalen vetëm nëse Irani hyn në negociata formale për paqe.
Presidenti Donald Trump ka paralajmëruar sërish se “nuk do të mbetet asgjë nga Irani” nëse nuk pranon kërkesat amerikane dhe nuk arrihet një armëpushim i përhershëm.
Ndërkohë, Këshilli Suprem i Sigurisë Kombëtare të Iranit ka njoftuar krijimin e një entiteti të ri për menaxhimin e Ngushticës së Hormuzit, një pikë kyçe për furnizimin global me energji, të cilën Irani e ka bllokuar praktikisht, duke paralajmëruar edhe vendosjen e tarifave për kalimin e anijeve.
