Ministri i Jashtëm i Iranit, Abbas Araghchi, ka akuzuar Shtetet e Bashkuara për kryerjen e krimeve të luftës, duke deklaruar se sulmet amerikane ndaj infrastrukturës jetike energjetike të Iranit përbëjnë një shkelje të rëndë të së drejtës ndërkombëtare.

Në një deklaratë të publikuar në platformën Telegram, Araghchi tha se kërcënimet dhe veprimet ushtarake të Uashingtonit tregojnë, sipas tij, “qëllimin kriminal të aparatit qeveritar amerikan për të kryer krime të tmerrshme”.

Kryediplomati iranian theksoi se sulmet amerikane përbëjnë “një shkelje flagrante të Kartës së Kombeve të Bashkuara dhe parimeve themelore të së drejtës ndërkombëtare”.

Sipas Araghchit, goditjet ndaj infrastrukturës civile përbëjnë krime të rënda ndërkombëtare dhe bien ndesh me parimet bazë të së drejtës penale ndërkombëtare, përfshirë katër Konventat e Gjenevës të vitit 1949.

Ai theksoi se të gjitha shtetet kanë detyrimin të hetojnë, ndjekin penalisht dhe ndëshkojnë autorët e krimeve të tilla.

Ministri iranian akuzoi gjithashtu zyrtarët amerikanë për përdorimin e “retorikës irracionale dhe kërcënimeve djallëzore”, duke pretenduar se armiqësia e Shteteve të Bashkuara ndaj Iranit buron nga vendosmëria e popullit iranian për të mbrojtur pavarësinë, të drejtat legjitime dhe dinjitetin e vendit.

Në përfundim të deklaratës, Araghchi paralajmëroi se personat përgjegjës për këto sulme nuk mund t’i shmangen përgjegjësisë ligjore duke pretenduar se kanë vepruar me urdhër të eprorëve të tyre.

Deklarata vjen në një kohë kur tensionet mes Teheranit dhe Uashingtonit janë përshkallëzuar ndjeshëm, pas sulmeve të fundit amerikane dhe përshkallëzimit të konfliktit në rajon.