Gjykata rrëzon tarifat e Trump, vendimi i shpall të paligjshme taksën 10% mbi importet
Pas një goditjeje të mëparshme nga Gjykata Supreme e SHBA, presidenti Donald Trump përballet me një tjetër pengesë ligjore, pasi Gjykata e Tregtisë Ndërkombëtare ka shpallur të paligjshme vendosjen e një tarife 10% mbi shumicën e importeve në Shtetet e Bashkuara të Amerikës.
Me një vendim jo unanim (2 me 1), gjykata konstatoi se Trump kishte përdorur në mënyrë të gabuar një ligj të vjetër tregtar për të justifikuar tarifat e vendosura që nga shkurti, duke theksuar se këto masa nuk përmbushnin kriteret ligjore për taksat mbi importet.
Si rezultat, vendimi i presidentit u cilësua “i pavlefshëm”, ndërsa tarifat e aplikuara ndaj paditësve u konsideruan të paautorizuara nga ligji.
Këto masa vinin pas një pakete të mëparshme tarifash ndëshkuese, e cila ishte rrëzuar nga Gjykata Supreme, dhe përbënin pjesë të strategjisë së Trump për të riformësuar marrëdhëniet tregtare, për të rritur të ardhurat dhe për të nxitur prodhimin vendas.
Vendimi i ri pritet të kufizojë më tej kompetencat tregtare të presidentit, ndërsa mbetet e paqartë se si administrata do të reagojë, megjithëse një apel duket i pashmangshëm.
Ky zhvillim vjen në prag të një vizite të rëndësishme në Kinë, ku Trump pritet të takohet me liderin Xi Jinping, me tregtinë si temë kryesore në axhendë.
Vendimi mund të dobësojë pozicionin negociues të SHBA-së, ndërsa rrit edhe mundësinë që administrata të detyrohet të kthejë një pjesë të konsiderueshme të të ardhurave nga tarifat, përfshirë rreth 166 miliardë dollarë të mbledhura nga masat e mëparshme ndaj mbi 90 vendeve.
