Gjatë vizitës në Rusi, Irani fajëson SHBA-në për dështimin e bisedimeve për paqe
Ministri i Jashtëm i Iranit, Abbas Araghchi, ka akuzuar Shtetet e Bashkuara për dështimin e negociatave të fundit për paqe, duke i cilësuar kërkesat e Uashingtonit si “të tepruara”.
Gjatë mbërritjes së tij në Shën Petersburg, Araghchi deklaroi se kishte pasur sinjale pozitive gjatë bisedimeve, por sipas tij, qasja amerikane bëri që raundi i fundit të mos arrinte objektivat e parashikuara.
“Pavarësisht progresit të arritur, kërkesat e tepërta dhe mënyra e gabuar e qasjes nga ana e SHBA-së çuan në dështimin e negociatave,” u shpreh ai për mediat.
Kryediplomati iranian pritet të zhvillojë takime me homologun rus Sergey Lavrov dhe me presidentin Vladimir Putin, ku në fokus do të jetë situata në Lindjen e Mesme dhe zhvillimet e fundit të konfliktit.
Deklaratat e tij vijnë një ditë pasi ai u rikthye me urgjencë në Islamabad për t’iu bashkuar bisedimeve me SHBA-në, ndërkohë që një armëpushim i ndërmjetësuar nga Pakistani në konfliktin mes SHBA-së, Izraelit dhe Iranit është në fuqi që prej 8 prillit.
Ndërkohë, zhvillimet pasojnë edhe vendimin e presidentit amerikan Donald Trump për të anuluar dërgimin e përfaqësuesve të tij në negociata, duke theksuar se bisedimet nuk po sillnin rezultate konkrete.
Gjatë vizitës në Rusi, Araghchi theksoi gjithashtu marrëdhëniet e ngushta mes Teheranit dhe Moskës, duke nënvizuar bashkëpunimin e vazhdueshëm mes dy vendeve në çështje të ndryshme ndërkombëtare.
