Konservatorët gjermanë rrisin presionin ndaj Ursula von der Leyen për të “shkurtuar makinerinë e Brukselit”

Ligjvënës të krahut të djathtë në Berlin pritet të përballen të hënën me Presidenten e Komisionit Evropian, Ursula von der Leyen, në një takim me dyer të mbyllura, duke i kërkuar kufizim të mëtejshëm të pushtetit të Bashkimit Evropian dhe ulje të burokracisë që ata e konsiderojnë të tepruar.

Sipas dy deputetëve gjermanë, grupi konservator në Bundestag synon t’i paraqesë von der Leyen kërkesa të forta për reduktimin e rregulloreve që ata i shohin si pengesë për bizneset gjermane dhe zhvillimin ekonomik.

Një draft-strategji e brendshme e konservatorëve, e siguruar nga POLITICO, përmban 27 propozime të drejtuara Komisionit Evropian dhe pasqyron një qasje më të ashpër të ligjvënësve gjermanë ndaj Brukselit.

Ndër idetë e diskutuara është krijimi i një organi mbikëqyrës që do të kishte të drejtën të bllokonte legjislacionin e ri të propozuar nga Komisioni Evropian. Një tjetër opsion sugjeron zgjerimin e kompetencave të një strukture ekzistuese këshillimore ose krijimin e një institucioni të ri në nivel evropian, gjë që do të kërkonte ndryshime në traktatet e BE-së.

Po ashtu, dokumenti kërkon një interpretim më të kufizuar të kompetencave të institucioneve evropiane dhe madje edhe reduktim të stafit në administratën e BE-së.

Deri vonë, von der Leyen dhe partia e saj CDU shpesh ndanin të njëjtin qëndrim për nevojën e rritjes së konkurrueshmërisë dhe uljes së rregullave. Por tani, konservatorët në Berlin po shfaqin gjithnjë e më shumë pakënaqësi ndaj ritmit të ngadaltë të reformave në Bruksel.

Kjo lëvizje vjen në një moment kur kancelari Friedrich Merz po përballet me presion për të përmbushur premtimet e tij elektorale për ringjalljen e ekonomisë gjermane, e cila vazhdon të jetë nën presion të madh.

Vetë Merz ka kritikuar më parë ashpër burokracinë e BE-së, duke e krahasuar atë me një “makineri që duhet ngadalësuar”.

Ndërkohë, Komisioni Evropian ka ndërmarrë disa përpjekje për thjeshtimin e ligjeve ekzistuese, por konservatorët gjermanë i konsiderojnë këto masa të pamjaftueshme si në shtrirje ashtu edhe në shpejtësi.