Kryetari i Lidhjes Demokratike të Kosovës, Lumir Abdixhiku, ka bërë të ditur se gjashtë deputetë të LDK-së kanë vendosur të mos mbështesin kandidaturën e Bekim Sejdiut për President të Kosovës, pavarësisht vendimit të Kryesisë së partisë.
Deklarata e Abdixhikut erdhi pas mbledhjes së Grupit Parlamentar të LDK-së, ku është diskutuar marrëveshja politike dhe kandidatura e Sejdiut për kreun e shtetit.
Sipas Abdixhikut, gjashtë deputetët kanë refuzuar të respektojnë vendimin e Kryesisë së LDK-së, e cila më herët gjatë ditës kishte miratuar marrëveshjen politike dhe kishte mbështetur nominimin e Bekim Sejdiut për President.
Kreu i LDK-së paralajmëroi se ky qëndrim mund të ketë pasoja për situatën politike në Kosovë dhe, sipas tij, rrezikon ta çojë vendin drejt zgjedhjeve të reja.
“Me keqardhje, gjashtë deputetë të LDK-së kanë vendosur të mos e respektojnë vendimin e Kryesisë së LDK-së. Ata kanë deklaruar se nuk e votojnë kandidatin e propozuar. Konsideroj se shkaktojnë dëm dhe e dërgojnë vendin në zgjedhje”, deklaroi Abdixhiku.
Ai bëri publikë edhe emrat e deputetëve që kanë kundërshtuar kandidaturën: Avdullah Hoti, Hykmete Bajrami, Janina Ymeri, Armend Zemaj, Kujtim Shala dhe Arben Gashi.
Qëndrimi i gjashtë deputetëve nxjerr në pah ndarjet brenda LDK-së në një moment vendimtar për procesin e zgjedhjes së Presidentit dhe krijon pikëpyetje mbi sigurimin e votave të nevojshme për kandidaturën e Sejdiut.
Kandidatura e Bekim Sejdiut ishte pjesë e marrëveshjes politike të arritur mes LDK-së dhe Lëvizjes Vetëvendosje, me synimin për të zhbllokuar situatën institucionale në Kosovë. Refuzimi i një pjese të deputetëve të LDK-së për ta mbështetur atë mund të komplikojë tashmë arritjen e shumicës së nevojshme dhe të rikthejë skenarin e zgjedhjeve të reja.
