Rama prezanton “Health Hub Hospital”: Tirana do të ketë spitalin e ekselencës europiane deri në 2028

Tirana pritet të kthehet në një qendër të rëndësishme të shërbimeve shëndetësore në Ballkanin Perëndimor me ndërtimin e spitalit të ekselencës europiane “Health Hub Hospital” (HHH), një investim i Grupit italian San Donato.

Gjatë prezantimit të projektit, kryeministri Edi Rama e cilësoi këtë investim si një hap të madh për sistemin shëndetësor shqiptar, duke theksuar se spitali do të ofrojë trajtim për sëmundje të ndërlikuara dhe do t’u japë qytetarëve një alternativë cilësore brenda vendit.

“Ndërtimi i një spitali ekselence italiane këtu në Tiranë do t’u japë mundësi të tjera atyre që sot i kërkojnë këto shërbime në Itali apo Turqi. Ky spital do të kurojë edhe sëmundjet më të komplikuara. Jam i sigurt që punimet do të realizohen me standardet më të larta dhe kemi vendosur si objektiv që gjithçka të jetë gati në fund të vjeshtës së vitit 2028”, u shpreh Rama.

Kreu i qeverisë falënderoi Grupin San Donato dhe partnerët italianë për investimin, duke nënvizuar se projekti është një tjetër dëshmi e marrëdhënieve të forta mes Shqipërisë dhe Italisë.

“Ky është një parashikim italo-shqiptar, pa shtysën arabe që mund t’i bëjë gjërat më shpejt. Marrëdhëniet italo-shqiptare kanë qenë gjithmonë të shkëlqyera dhe nuk janë ndikuar nga zhvillimet politike”, tha ai.

Rama theksoi se projekti nuk do të sjellë vetëm një spital modern, por edhe një qendër ekselence që do të krijojë kushte pune sipas standardeve europiane për mjekët dhe infermierët shqiptarë.

“Ky është një hap shumë i rëndësishëm për sektorin tonë shëndetësor. E nisëm me një infrastrukturë larg standardeve dhe kemi bërë përparim të madh, por kemi ende shumë punë për të bërë për të garantuar jo vetëm infrastrukturë moderne, por edhe cilësi të lartë shërbimi. Ky nuk do të jetë thjesht një spital ekselence që vjen nga jashtë, por një qendër ku ekselenca do të krijojë kushte të reja për mjekët dhe infermierët shqiptarë në një realitet europian”, deklaroi ai.

Në përfundim të fjalës së tij, kryeministri falënderoi mjekët dhe personelin shëndetësor shqiptar për kontributin e tyre, duke theksuar se investime të tilla synojnë të forcojnë më tej sistemin shëndetësor dhe t’u ofrojnë qytetarëve shërbime me standarde europiane pa qenë e nevojshme të kërkojnë trajtim jashtë vendit.