Rusia ka reaguar ashpër ndaj vendimit të Bashkimit Europian për t’u dhënë anijeve ushtarake të misionit detar “Operation IRINI” autoritetin për të ndaluar dhe inspektuar anije të huaja të dyshuara se transportojnë naftë ruse si pjesë e të ashtuquajturës “flotë në hije”.

Pas zgjerimit të mandatit të operacionit nga Bashkimi Europian, Moska paralajmëroi se do të përdorë të gjitha mjetet ligjore dhe politike për të mbrojtur interesat e saj detare dhe të operatorëve të transportit.

Zëdhënësja e Ministrisë së Jashtme ruse, Maria Zakharova, e cilësoi vendimin si një kërcënim për sigurinë detare dhe akuzoi BE-në se po ushtron presion ndaj anijeve civile në ujërat ndërkombëtare.

Sipas saj, termi “flotë në hije” nuk ekziston në të drejtën ndërkombëtare dhe përbën një konstrukt politik të krijuar nga Bashkimi Europian.

“Përdorimi i anijeve të operacionit detar IRINI në Mesdhe për të inspektuar ose sekuestruar anije që transportojnë produkte nafte do të përbënte një shkelje flagrante të së drejtës ndërkombëtare”, deklaroi Zakharova gjatë një konference për shtyp.

Ajo shtoi se Rusia rezervon të drejtën të përdorë “të gjithë arsenalin e instrumenteve politike, ligjore dhe të tjera” për të garantuar sigurinë detare dhe për të mbrojtur interesat legjitime të pronarëve dhe operatorëve të anijeve.

Bashkimi Europian njoftoi të hënën zgjerimin e mandatit të “Operation IRINI”, mision i krijuar fillimisht për monitorimin e embargos së armëve të Kombeve të Bashkuara ndaj Libisë. Me ndryshimet e reja, misioni do të ketë kompetenca shtesë për të monitoruar dhe inspektuar anije të dyshuara se ndihmojnë në shmangien e sanksioneve ndaj eksporteve ruse të naftës.