Macron: Franca ndalon një tjetër cisternë ruse që shmangte sanksionet

Marina Franceze ka ndaluar një tjetër anije cisternë ruse gjatë një operacioni në Oqeanin Atlantik, në kuadër të përpjekjeve për zbatimin e sanksioneve ndërkombëtare ndaj Rusisë.

Lajmin e bëri të ditur presidenti francez Emmanuel Macron, i cili përmes një reagimi publik theksoi se shmangia e sanksioneve dhe financimi i luftës në Ukrainë nuk mund të tolerohen.

“Është e papranueshme që anijet po shmangin sanksionet ndërkombëtare, duke shkelur ligjin detar dhe duke financuar luftën që Rusia ka zhvilluar kundër Ukrainës për më shumë se katër vjet”, deklaroi Macron.

Operacioni u realizua me mbështetjen e disa partnerëve ndërkombëtarë, përfshirë Mbretërinë e Bashkuar, ndërsa autoritetet franceze publikuan edhe pamje nga ndërhyrja në det të hapur.

Sipas Parisit zyrtar, kjo është anija e katërt cisternë ruse e ndaluar nga Franca në kuadër të operacioneve që synojnë parandalimin e shmangies së sanksioneve të vendosura ndaj Moskës pas nisjes së luftës në Ukrainë.

Autoritetet franceze theksojnë se kontrollet do të vijojnë, me qëllim goditjen e rrjeteve që përdoren për transportin e naftës ruse jashtë mekanizmave ndërkombëtarë të monitorimit dhe sanksioneve.