Demo prezanton programin “Rilindja 2.0”, 11 objektiva për zhvillimin vendor

Ministri i Shtetit për Pushtetin Vendor Ervin Demo prezantoi sot programin e ri “Rilindja 2.0”, një paketë me 11 objektiva strategjikë që synon të sjellë një qasje të re në zhvillimin vendor dhe ndërhyrjet në territor në të gjithë vendin. Prezantimi u bë në një konferencë për shtyp pas mbledhjes së qeverisë, ku ministri theksoi se programi përfaqëson një model të integruar zhvillimi që ndërthur identitetin lokal, inovacionin, infrastrukturën dhe teknologjinë në funksion të rritjes së qëndrueshme ekonomike dhe përmirësimit të shërbimeve publike.

Demo u shpreh se “Rilindja 2.0” synon të forcojë identitetin e zonave të ndryshme të vendit përmes krijimit të muzeve lokalë dhe hapësirave kulturore, të cilat sipas tij do të shërbejnë jo vetëm si ruajtje e trashëgimisë, por edhe si element zhvillimi për turizmin. Në këtë kuadër, ai theksoi se çdo zonë do të ketë mundësi të ndërtojë një profil më të qartë kulturor dhe ekonomik, duke u bërë më tërheqëse për vizitorët dhe investitorët.

Një tjetër komponent i rëndësishëm i programit lidhet me zhvillimin urban dhe përmirësimin e aksesit në qytete. Sipas ministrit, janë identifikuar rreth 160.000 m² sipërfaqe në 12 bashki që mund të shndërrohen në rreth 15.000 vende parkimi, një ndërhyrje që synon lehtësimin e trafikut dhe menaxhimin më efikas të hapësirave urbane, veçanërisht në zonat me fluks të lartë turistik dhe ekonomik.

Programi parashikon gjithashtu rigjenerimin e ish-hapësirave industriale, të cilat do të transformohen në asete për komunitetin. Këto hapësira, sipas Demës, do të shfrytëzohen për funksione publike si zona sportive dhe rekreative, por edhe për nxitjen e sipërmarrjes dhe zhvillimin e start-up-eve në nivel lokal, me qëllim krijimin e më shumë mundësive ekonomike për të rinjtë.

Në fokus është edhe përmirësimi i infrastrukturës publike, ku do të punohet për harmonizimin e arkitekturës urbane dhe ngritjen e standardeve në objekte të shërbimeve publike, përfshirë edhe sistemin arsimor. Në këtë proces, sipas ministrit, janë angazhuar arkitektë vendas dhe të huaj për të ndihmuar bashkitë në hartimin e projekteve që rrisin vlerën e territorit dhe cilësinë e shërbimeve.

Demo theksoi gjithashtu se inovacioni dhe zhvillimi i start-up-eve do të kenë një rol të veçantë në program, me synimin për të shpërndarë më gjerësisht aktivitetin ekonomik jashtë Tiranës dhe për të krijuar një hartë më dinamike zhvillimi në nivel kombëtar. Ai nënvizoi se kjo qasje synon të mbështesë të rinjtë dhe idetë e reja në çdo bashki të vendit.

Një pjesë e rëndësishme e programit lidhet edhe me menaxhimin e mbetjeve dhe përmirësimin e standardeve mjedisore, ku synohet mbulimi i plotë i territorit dhe përafrimi me kërkesat e Bashkimit Evropian, përfshirë riciklimin dhe trajtimin më efikas të mbetjeve urbane. Po ashtu, parashikohet zhvillimi i transportit urban me autobusë elektrikë, ku një bashki pritet të pilotojë projektin brenda tremujorit të fundit të vitit.

Programi përfshin edhe krijimin e hapësirave të reja sportive dhe rekreative, me rreth 140 pika të identifikuara në nivel kombëtar, si dhe forcimin e kapaciteteve të bashkive për mirëmbajtjen e infrastrukturës dhe menaxhimin e emergjencave, përmes një flote të re logjistike që do të ndihmojë në raste përmbytjesh dhe ndërhyrjesh në terren.

Në përmbyllje, Demo tha se “Rilindja 2.0” synon një transformim të thellë të zhvillimit vendor, duke e përafruar më tej Shqipërinë me standardet e Bashkimit Evropian dhe duke krijuar një model më efikas të qeverisjes lokale dhe zhvillimit territorial.