Trump pritet të vendosë për rifillimin e sulmeve në Iran brenda 24 orëve
Media izraelite Channel 12 raporton se Presidenti i SHBA-së Donald Trump pritet të mbledhë ekipin e tij të ngushtë të këshilltarëve brenda 24 orëve për të marrë një vendim përfundimtar lidhur me rifillimin e sulmeve në Iran.
Sipas një zyrtari të lartë izraelit, i cituar nga media, “rifillimi i armiqësive po afron”, ndërsa Izrael po përgatitet për mundësinë e një përshkallëzimi të situatës, që mund të përfshijë ditë ose javë luftime.
Burimi thekson se pala amerikane është e vetëdijshme që negociatat nuk po shënojnë përparim, ndërsa në Jerusalem pritet me interes vendimi i Presidentit Trump, i cili mund të qartësojë zhvillimet në orët në vijim.
Zhvillimet e fundit rrisin tensionet në rajon, ndërsa një vendim për rifillimin e sulmeve mund të ketë pasoja të gjera për sigurinë ndërkombëtare.
