Merz bisedë telefonike me Trump, përpjekje për uljen e tensioneve mes Gjermanisë dhe SHBA

Marrëdhëniet mes Gjermanisë dhe Shteteve të Bashkuara të Amerikës kanë qenë të tensionuara në javët e fundit, por një bisedë telefonike mes kancelarit gjerman Friedrich Merz dhe presidentit amerikan Donald Trump duket se ka shënuar një hap drejt normalizimit të tyre.

Vetë kancelari Merz bëri të ditur se telefonata me presidentin amerikan kishte qenë “shumë e mirë”, duke nënvizuar se të dy liderët kanë diskutuar mbi disa nga çështjet më të rëndësishme të sigurisë globale. Në fokus të bisedës ishte situata me Iranin, për të cilën të dy ranë dakord se duhet të rikthehet në tryezën e negociatave.

Po ashtu, ata theksuan rëndësinë që Ngushtica e Hormuzit të mbetet e hapur dhe ritheksuan qëndrimin se Irani nuk duhet të zotërojë armë bërthamore.

Sipas kancelarit gjerman, pjesë e diskutimeve ishin edhe përpjekjet për një zgjidhje paqësore të konfliktit në Ukrainë, si dhe samiti i ardhshëm i NATO-s që pritet të zhvillohet në fillim të qershorit. Në këtë kuadër, Merz theksoi se Gjermania dhe SHBA mbeten partnerë të fortë brenda një aleance të fuqishme si NATO.

Telefonata mes dy liderëve vjen pas një periudhe përplasjesh publike. Presidenti Trump kishte reaguar ashpër ndaj disa deklaratave të Merz për mungesën e një strategjie të qartë amerikane ndaj Iranit, duke e akuzuar kancelarin se nuk ishte i informuar. Ai kishte paralajmëruar gjithashtu mundësinë e tërheqjes së trupave amerikane nga Gjermania.

Në fillim të muajit maj, administrata amerikane njoftoi tërheqjen e rreth 5000 trupave nga Gjermania, duke e lidhur këtë vendim me një rishikim të pranisë ushtarake në Europë.

Megjithatë, zhvillimet e fundit sinjalizojnë një përpjekje për të ulur tensionet dhe për të ruajtur bashkëpunimin strategjik mes dy vendeve në një periudhë sfidash të shumta ndërkombëtare.