G7 paralajmëron për rreziqe në ekonominë globale, shqetësim për kufizimet e eksporteve dhe tensionet tregtare

Ministrat e Tregtisë së G7 kanë shprehur shqetësim të thellë për rritjen e masave të ashtuquajtura të “shtrëngimit ekonomik”, duke paralajmëruar për ndikime serioze në stabilitetin e ekonomisë globale.

Në përfundim të një takimi dyditor në Paris, ministrat theksuan se kufizimet arbitrare ndaj eksporteve dhe ndërhyrjet në treg mund të shkaktojnë ndërprerje në zinxhirët e furnizimit, veçanërisht për mineralet kritike, duke rrezikuar sigurinë dhe qëndrueshmërinë ekonomike ndërkombëtare.

Sipas deklaratës së përbashkët, vendet e G7 ranë dakord të forcojnë bashkëpunimin për të adresuar çekuilibrat në tregtinë globale, përfshirë praktikat jo-tregtare, subvencionet e tepërta dhe mbikapacitetin industrial.

Ministri francez për Tregtinë, Nicolas Forissier, deklaroi se takimi prodhoi rezultate konkrete dhe se vendet anëtare do të intensifikojnë analizën dhe përgjigjet e përbashkëta ndaj këtyre sfidave.

Franca, e cila aktualisht mban presidencën e G7, mirëpriti delegacionet nga Kanada, Italia, Gjermania, Japonia, Britania e Madhe dhe Shtetet e Bashkuara të Amerikës.

Takimi u zhvillua në një klimë të tensionuar globale, ku lufta në Lindjen e Mesme dhe pasiguritë rreth Ngushtica e Hormuzit kanë ndikuar drejtpërdrejt në tregjet energjetike, duke qenë se përmes saj kalon një pjesë e konsiderueshme e naftës botërore.

Një tjetër çështje e ndjeshme mbetet edhe marrëdhënia tregtare mes SHBA-së dhe Bashkimit Evropian. Presidenti amerikan Donald Trump ka paralajmëruar rritje të tarifave për automjetet europiane, duke akuzuar BE-në për mosrespektim të marrëveshjes së mëparshme.

Ndërkohë, marrëveshja për kufizimin e tarifave në 15% për automjetet dhe pjesët e BE-së, e arritur vitin e kaluar, mbetet ende në proces miratimi nga vendet anëtare të Bashkimit Evropian, duke lënë të hapur mundësinë për përshkallëzim të mëtejshëm të tensioneve tregtare.