António Guterres, Sekretari i Përgjithshëm i OKB: “Hapni Ngushtica e Hormuzit, ekonomia globale po mbytet”

Sekretari i Përgjithshëm i OKB, António Guterres, ka kritikuar ashpër kufizimet në Ngushtica e Hormuzit, duke paralajmëruar se ato po pengojnë furnizimin global me naftë, gaz, plehra dhe mallra të tjera kritike, me pasoja të rënda për ekonominë botërore.

Në një deklaratë të fortë, Guterres paraqiti tre skenarë të mundshëm për zhvillimin e situatës, duke theksuar se edhe në rastin më optimist, dëmet do të jenë të ndjeshme:

“Edhe nëse kufizimet në transportin detar dhe tregtinë hiqen menjëherë, zinxhirët e furnizimit do të duhen muaj për t’u rikuperuar… Ky është skenari më i mirë”.

Ai shtoi se një botë që ende po përballet me pasojat e pandemisë dhe luftës në Ukrainë do të përballet me sfida të reja ekonomike, përfshirë rritjen e inflacionit dhe ngadalësimin e tregtisë globale.

Guterres theksoi gjithashtu përpjekjet diplomatike të UNOPS dhe strukturave të tjera të OKB për krijimin e një korridori humanitar dhe garantimin e lëvizjes së sigurt në këtë zonë strategjike.

Duke paralajmëruar për skenarët më të rëndë, ai theksoi se nëse ndërprerjet vazhdojnë deri në mesin apo fundin e vitit, pasojat do të jenë dramatike:

“Tridhjetë e dy milionë njerëz janë shtyrë drejt varfërisë… 45 milionë të tjerë përballen me uri ekstreme… dhe në skenarin më të keq përballemi me një recesion global”.

Në përfundim, kreu i OKB bëri një thirrje të drejtpërdrejtë për të gjitha palët:

“Mesazhi im për të gjitha palët është i qartë: Të drejtat dhe liritë e lundrimit duhet të rivendosen menjëherë… Hapni Ngushticën. Le të kalojnë të gjitha anijet. Le të marrë frymë përsëri ekonomia globale”.