Sistemi i ri kufitar i BE-së sjell vonesa në aeroporte, rritet ndjeshëm koha e kontrollit të pasaportave
Sistemi i ri i Hyrjeve dhe Daljeve (Entry/Exit System – EES) i Bashkimit Evropian po shkakton vonesa në një sërë aeroportesh evropiane, duke rritur ndjeshëm kohën e kontrollit të pasaportave për shtetasit e vendeve jashtë BE-së, përfshirë britanikët.
Sipas Ivan Bassato, drejtorit kryesor të aviacionit në aeroportin Fiumicino të Romës, koha mesatare e kalimit në kontrollin kufitar është rritur nga rreth shtatë minuta në afro 20 minuta, pavarësisht përmirësimeve të bëra në sistem.
Ai tha se integrimi i EES me portat elektronike ka ndihmuar në lehtësimin e procedurave, por sistemi ende nuk arrin nivelin e efikasitetit që kishte procesi i mëparshëm.
Paralelisht, kompania ajrore Ryanair u ka bërë thirrje pasagjerëve që udhëtojnë drejt vendeve të Evropës të planifikojnë më shumë kohë për procedurat kufitare, duke paralajmëruar se zbatimi i sistemit të ri po shkakton radhë dhe vonesa në disa aeroporte.
Probleme janë raportuar edhe në aeroportin e Faros, në Portugali. Mbikëqyrësi i autoriteteve kufitare, Pedro Oliveira, deklaroi se sistemi has herë pas here vështirësi teknike.
Sipas tij, pritjet që më parë zgjatnin rreth 10 minuta tashmë mund të kalojnë 30 minuta, ndërsa vonesat mbi një orë mbeten të rralla dhe ndodhin kryesisht kur mbërrijnë disa fluturime në të njëjtën kohë.
Nga ana tjetër, Komisioni Evropian ka bërë të ditur se ndërprerjet në shumicën e aeroporteve të Bashkimit Evropian janë të kufizuara dhe se do të vazhdojë të mbështesë shtetet anëtare në zbatimin dhe përmirësimin e sistemit të ri.
EES është sistemi dixhital i Bashkimit Evropian që regjistron hyrjet dhe daljet e shtetasve të vendeve jashtë BE-së në Zonën Shengen. Ai kërkon regjistrimin e gjurmëve të gishtërinjve dhe fotografisë biometrike të udhëtarëve gjatë hyrjes së parë në territorin Shengen, ndërsa të dhënat verifikohen sërish në momentin e largimit.
Procedurat kryhen kryesisht përmes kiosave automatike ose portave elektronike, ndërsa fëmijët nën moshën 12 vjeç kontrollohen nga oficerët kufitarë.
Në disa aeroporte evropiane, përfshirë Romën dhe Barcelonën, pasagjerët kanë raportuar pritje që variojnë nga 45 minuta deri në dy orë. Në disa raste, vonesat kanë bërë që udhëtarët të humbasin edhe fluturimet e tyre.
Drejtuesit e aeroporteve kanë kërkuar përmirësime të mëtejshme të sistemit, duke propozuar eliminimin e procedurave të dyfishta dhe zgjerimin e përdorimit të aplikacionit evropian të para-regjistrimit, i cili aktualisht përdoret vetëm nga Suedia dhe Portugalia.
