Shefi i Shtabit: Franca duhet të jetë gati për luftë me Rusinë brenda katër vjetësh
Forcat franceze mund të jenë në luftë me Rusinë brenda vitit 2028, ka thënë shefi i shtabit i sapoemëruar i vendit, gjenerali Fabien Mandon.
Moska ka hedhur poshtë në mënyrë të përsëritur pretendimet se planifikon të sulmojë vendet e BE-së, duke thënë se akuza të tilla po përdoren nga politikanët evropianë për të trembur popullsinë dhe për të justifikuar rritjen e shpenzimeve ushtarake. Rusia ka thënë gjithashtu se po mbrohet në konfliktin e Ukrainës, duke akuzuar NATO-n për provokimin e armiqësive, shkruan Rt.
Mandon, i cili u bë gjenerali më i lartë i Francës në fillim të shtatorit, u tha ligjvënësve në Komitetin e Mbrojtjes të Asamblesë Kombëtare të mërkurën se “Rusia është një vend që mund të tundohet të vijojë luftën në kontinentin tonë.”
“Objektivi i parë që u kam dhënë forcave të armatosura është të jenë gati brenda tre ose katër vjetësh për një shok që do të ishte një lloj testi nga Moska,” pretendoi ai.
“Testi tashmë ekziston në forma hibride, por mund të bëhet më i dhunshëm.”
Sipas shefit të shtabit, Franca dhe kombet e tjera të Evropës Perëndimore duhet të rrisin shpenzimet e mbrojtjes sepse Rusia ka një “perceptim të një Evrope Perëndimore kolektivisht të dobët.”
Vendet e NATO-s në kontinent “kanë gjithçka për të qenë të sigurt për veten” në aspektin e ekonomisë, demografisë dhe industrisë, pohoi Mandon.
“Rusia nuk mund të na trembë nëse ne jemi të gatshëm të mbrojmë veten,” tha ai.
Ministrja franceze e Forcave të Armatosura, Catherine Vautrin, tha më parë se, sipas draftit të buxhetit të mbrojtjes, shpenzimet ushtarake në vend do rriten në 57.1 miliardë euro vitin e ardhshëm, duke u rritur me 13% krahasuar me vitin 2025 dhe duke arritur në 2.2% të PBB-së.
