Kryeministri izraelit Benjamin Netanyahu deklaroi se Izraeli nuk është palë në memorandumin e mirëkuptimit të raportuar mes Shteteve të Bashkuara dhe Iranit, duke theksuar se vendimet që lidhen me sigurinë kombëtare të vendit do të merren në mënyrë të pavarur nga qeveria izraelite.

Në një reagim publik, Netanyahu nënvizoi se Tel Avivi mbetet i fokusuar te kërcënimi që, sipas tij, paraqet programi bërthamor dhe raketor i Iranit, pavarësisht zhvillimeve diplomatike mes Uashingtonit dhe Teheranit.

Kryeministri izraelit vlerësoi presidentin amerikan Donald Trump për përpjekjet e tij në drejtim të kufizimit të kapaciteteve ushtarake të Iranit, duke përmendur veçanërisht programin raketor, infrastrukturën e pasurimit bërthamor, largimin e uraniumit të pasuruar dhe ndërprerjen e mbështetjes iraniane për grupet aleate në rajon.

“Ne vlerësojmë angazhimin e administratës amerikane për të adresuar këto çështje thelbësore që lidhen me sigurinë e rajonit”, mësohet të ketë deklaruar Netanyahu.

Ndërkohë, presidenti amerikan Donald Trump tha se udhëheqësi suprem i Iranit, Mojtaba Khamenei, ka miratuar marrëveshjen e propozuar me Shtetet e Bashkuara.

“Sipas informacionit që kam, të gjithë në Iran e kanë miratuar marrëveshjen”, deklaroi Trump.

Megjithatë, deri tani nuk ka pasur asnjë konfirmim zyrtar nga autoritetet iraniane për ekzistencën apo miratimin e një marrëveshjeje të tillë. Teherani nuk ka komentuar publikisht pretendimet e presidentit amerikan, ndërsa burime zyrtare iraniane vijojnë të mbajnë një qëndrim të rezervuar mbi negociatat me SHBA-në.

Deklaratat vijnë në një moment kur përpjekjet diplomatike për uljen e tensioneve në Lindjen e Mesme duket se po intensifikohen, ndërsa komuniteti ndërkombëtar po ndjek me vëmendje zhvillimet që mund të ndikojnë në sigurinë rajonale dhe programin bërthamor iranian.