Mirela Kumbaro prezanton strategjinë e re të arsimit 2027–2032, fokus modernizimi dhe ndërkombëtarizimi
Ministrja e Arsimit, Mirela Kumbaro, njoftoi në mbledhjen e sotme të qeverisë nisjen e punës për hartimin e Strategjisë Kombëtare të Arsimit 2027–2032, një dokument i rëndësishëm që do të udhëheqë zhvillimin e sektorit arsimor në vitet e ardhshme.
Gjatë fjalës së saj, ministrja bëri të ditur se strategjia e re vjen në një moment kyç, pasi vendi ndodhet në vitin e fundit të zbatimit të strategjisë aktuale, ndërkohë që zhvillimet e fundit kërkojnë një qasje të përditësuar dhe më ambicioze për të ardhmen e arsimit në Shqipëri.
“U miratua propozimi i Ministrisë së Arsimit për hartimin e strategjisë së re 2027–2032. Jemi në vitin e fundit të strategjisë pararendëse dhe gjatë kësaj kohe kanë ndodhur shumë zhvillime të rëndësishme, si në arsimin parauniversitar, ashtu edhe në arsimin e lartë dhe kërkimin shkencor”, u shpreh Kumbaro.
Ajo theksoi se një nga shtyllat kryesore të kësaj strategjie do të jetë modernizimi i kurrikulës në arsimin parauniversitar, një proces që tashmë ka nisur dhe do të vijojë gradualisht deri në vitin 2032.
“Modernizimi i kurrikulës ka filluar që këtë vit me klasat e para, të gjashta dhe të dhjeta, dhe do të shtrihet në të gjitha nivelet deri në përfundim të ciklit. Paralelisht, do të vijojë me të njëjtin intensitet plani për Teknologjinë e Informacionit dhe Komunikimit në sistemin parauniversitar, përmes platformës SMIP dhe pajisjes së shkollave me laboratorë inteligjentë”, deklaroi ajo.
Sipas ministres, deri në 1000 shkolla do të pajisen me laboratorë inteligjentë, ndërsa mësuesit e arsimit të mesëm të lartë do të pajisen me laptopë, duke synuar rritjen e cilësisë së mësimdhënies dhe integrimin e teknologjisë në procesin edukativ.
Në kuadër të projekteve konkrete, Kumbaro përmendi edhe hapjen e Liceut Francez në Korçë, një iniciativë në bashkëpunim me qeverinë franceze që synon krijimin e një modeli ekselence në fushën e shkencës dhe teknologjisë.
“Për hapjen e Liceut Francez me orientim në shkencë dhe teknologji kemi hedhur në konsultim publik projektligjin e posaçëm. Ky institucion do të ofrojë diploma të njohura nga të dy vendet dhe synon të krijojë një model të ri cilësor për arsimin”, tha ministrja.
Një tjetër element i rëndësishëm i strategjisë janë edhe reformat institucionale. Kumbaro bëri të ditur se është drejt finalizimit një ligj i ri që parashikon transformimin e Qendrës së Shërbimeve Arsimore në një agjenci autonome, e cila do të menaxhojë të gjithë procesin e provimeve kombëtare.
Gjithashtu, ajo njoftoi se Qendra e Botimeve të Diasporës do të kthehet në Agjenci Kombëtare të Gjuhës Shqipe në Diasporë, me synimin për të forcuar rolin e gjuhës shqipe në komunitetet jashtë vendit dhe për ta integruar atë në kornizën europiane të gjuhëve.
Duke folur për arsimin e lartë, ministrja theksoi se fokusi do të jetë te cilësia dhe ndërkombëtarizimi i universiteteve shqiptare.
“Ka filluar puna për rishikimin e ligjit të Arsimit të Lartë pas 10 vitesh, me dy prioritete kryesore: forcimin e mekanizmave të cilësisë dhe hapjen e tregut të arsimit të lartë drejt ndërkombëtarizimit. Synojmë të bashkëpunojmë me universitete ndërkombëtare për të hapur programe të përbashkëta dhe për të tërhequr studentë të huaj”, u shpreh Kumbaro.
Ajo shtoi se ky proces është i domosdoshëm për t’iu përgjigjur kërkesave të tregut të punës në të ardhmen, i cili do të jetë gjithnjë e më i integruar me tregun europian.
Në përfundim, ministrja theksoi se strategjia e re synon të ndërtojë një sistem arsimor modern, gjithëpërfshirës dhe të orientuar drejt zhvillimit të qëndrueshëm, duke përgatitur brezat e rinj për sfidat e së ardhmes.
