Rama: Marrëveshja me “Fincantieri” hap një epokë të re për industrinë detare dhe Forcat e Armatosura

Kryeministri Edi Rama ka vlerësuar si një moment të rëndësishëm për zhvillimin ekonomik dhe ushtarak të vendit marrëveshjen e nënshkruar mes kompanisë shqiptare KAYO dhe gjigantit italian “Fincantieri”, për prodhimin e anijeve në kantierin detar të Pashalimanit.

Në fjalën e tij gjatë ceremonisë së nënshkrimit, Rama theksoi se ky bashkëpunim shënon jo vetëm një investim në industrinë e mbrojtjes, por edhe një vizion të ri për transformimin e kantierëve detarë në Shqipëri.

Sipas tij, projekti parashikon ndërtimin e dy anijeve të para për Forcat e Armatosura shqiptare, ndërsa më pas linja e prodhimit do të zgjerohet edhe për vende aleate, duke e pozicionuar Shqipërinë si një aktor të ri në industrinë detare rajonale.

“Jemi në një pikë të rëndësishme për të ardhmen e ekonomisë dhe të rinjve shqiptarë. Kjo marrëveshje me ‘Fincantieri’-n në Pashaliman nuk është thjesht një projekt industrial, por krijimi i një ekselence italo-shqiptare që do të sjellë inovacion në industrinë detare,” u shpreh Rama.

Ai theksoi gjithashtu se marrëveshja do të ketë ndikim të drejtpërdrejtë në formimin profesional të të rinjve, veçanërisht të nxënësve të shkollës industriale në Vlorë, të cilët do të përfshihen në programe trajnimi me ekspertë italianë.

Sipas kryeministrit, ata do të kenë mundësi të arsimohen dhe të formohen profesionalisht në Shqipëri me standarde të ngjashme me ato të Italisë, duke krijuar një brez të ri specialistësh për industrinë detare.

Rama nënvizoi se ky projekt vjen si rezultat i një vizioni afatgjatë për modernizimin e kapaciteteve të mbrojtjes dhe për forcimin e pozicionit të Shqipërisë brenda NATO-s.

Ai shtoi se, përtej aspektit ushtarak, iniciativa pritet të gjenerojë zhvillim ekonomik dhe mundësi eksporti në të ardhmen, duke e kthyer kantierin e Pashalimanit në një qendër të rëndësishme prodhimi.

Në përmbyllje të fjalës së tij, Rama e cilësoi këtë marrëveshje si një hap strategjik që forcon bashkëpunimin me Italinë dhe e vendos Shqipërinë në një trajektore të re zhvillimi në industrinë e mbrojtjes dhe inovacionit teknologjik.