Kancelari gjerman Friedrich Merz ka lënë të hapur mundësinë e një riorganizimi të qeverisë së tij, pas dorëheqjes së Jens Spahn nga posti i kreut të grupit parlamentar të Bashkimit Kristian Demokrat (CDU).

Spahn dha dorëheqjen të shtunën, pasi u publikuan informacione se ai dhe bashkëshorti i tij kanë pasur një fëmijë përmes një nëne surrogate në Shtetet e Bashkuara. Surrogacia është e ndaluar në Gjermani dhe CDU-ja ka rikonfirmuar edhe këtë vit kundërshtimin e saj ndaj kësaj praktike, duke e vendosur Spahn përballë akuzave për hipokrizi.

Në një intervistë për transmetuesin publik gjerman ZDF, e regjistruar të dielën, Merz tha se zhvillimet e fundit mund të krijojnë hapësirë për ndryshime në kabinet.

“Mund të jetë një mundësi për të menduar edhe një herë për përbërjen e qeverisë federale”, deklaroi ai, duke theksuar disa herë se bëhej fjalë për një mundësi dhe jo për një plan konkret.

I pyetur nëse shefi i tij i kabinetit, Thorsten Frei, mund të jetë pasuesi i Spahn, Merz nuk pranoi të komentojë emra.

Kancelari gjithashtu nuk e mbrojti personalisht Spahn, duke thënë se nuk e kishte parashikuar reagimin e fortë publik.

“Ndoshta kjo kishte të bënte edhe me personin e tij, por edhe me mënyrën se si u komunikua çështja”, u shpreh Merz.

Ai zbuloi se Spahn e kishte informuar rreth 10 ditë më parë për lindjen e fëmijës dhe i kishte kërkuar ta mbante sekret këtë informacion.

“E bëra këtë. Por ai e informoi partinë shumë, shumë vonë dhe të shtunën u bë plotësisht e qartë se sa i madh ishte dëmi ndaj besueshmërisë së saj. Prandaj vepruam”, tha kancelari.

Sipas mediave gjermane, ishte vetë Merz ai që i kërkoi Spahn të jepte dorëheqjen.

Kur u pyet nëse ndihej i tradhtuar nga ish-ministri i Shëndetësisë, Merz shmangu një përgjigje të drejtpërdrejtë.

“Nuk dua ta vlerësoj këtë publikisht”, tha ai, duke shtuar se e konsideron çështjen të mbyllur dhe duke falënderuar Spahn për kontributin e tij në reformat e fundit të koalicionit qeverisës.

Sipas ZDF, drejtuesit e CDU-së pritet të diskutojnë në ditët në vijim për emrin që do të zëvendësojë Jens Spahn në krye të grupit parlamentar.