Mbreti Charles mirëpret udhëheqësit e Ballkanit Perëndimor në Londër
Mbreti Charles III ka mirëpritur udhëheqësit e Ballkanit Perëndimor në Londër, për bisedime mbi emigracionin, sigurinë dhe rritjen ekonomike.
Delegacione nga Shqipëria, Bosnja, Kosova, Mali i Zi, Maqedonia e Veriut dhe Serbia po marrin pjesë në një samit të mbajtur si pjesë e Procesit të Berlinit, i nisur në vitin 2014 për të mbajtur vendet e Evropës Juglindore duke punuar drejt anëtarësimit në Bashkimin Evropian.
I vetmi vend i Ballkanit Perëndimor që u bashkua me BE-në është Kroacia, e cila u bë anëtare në vitin 2013.
Hapja e BE-së për të pranuar anëtarë të rinj është rritur që nga pushtimi i plotë i Ukrainës nga Rusia në vitin 2022.
Ka shqetësime se lufta në Ukrainë dhe konfrontimi në thellim i Rusisë me Perëndimin mund të përhapen në një rajon ende të prekur nga konfliktet e veta.
Londra do të presë zyrtarisht liderët rajonalë në takimin e radhës të Procesit të Berlinit, i cili do të mbahet në kryeqytetin britanik.
Shqipëria do të përfaqësohet nga kryeministri Edi Rama, i cili është bërë pjesë e disa tryezave dhe forumeve që të martën e 21 tetorit, ku ka folur për tema të ndryshme si integrimi drejt Bashkimit Evropian dhe ndërveprimi rajonal, e deri te gjeopolitika e kontinentit të vjetër.
Takimi i sivjetshëm, i cili zhvillohet në Londër nën mikpritjen e kryeministrit britanik Keir Starmer, do të mbledhë në një tryezë liderët e Shqipërisë, Kosovës, Serbisë, Malit të Zi, Bosnjë-Hercegovinës dhe Maqedonisë së Veriut, si dhe përfaqësues të vendeve anëtare të BE-së, përfshirë Gjermaninë dhe Francën.
Në ndryshim nga edicionet e kaluara, këtë vit nuk pritet nënshkrimi i marrëveshjeve të reja, por miratimi i disa deklaratave të përbashkëta, që synojnë forcimin e tregut të përbashkët rajonal dhe bashkëpunimin në fushën e energjisë.
Sipas njoftimeve paraprake nga Ministria e Jashtme britanike, liderët do të diskutojnë mbi “stabilitetin, sigurinë dhe bashkëpunimin ekonomik në rajon”, në një format tashmë të konsoliduar të Procesit të Berlinit, i cili këtë vit shënon samitin e tij të dymbëdhjetë.
Britania e Madhe, si vendi mikpritës, pritet të vendosë theks të veçantë te lufta kundër krimit të organizuar, korrupsionit dhe menaxhimi i migracionit të paligjshëm – një çështje me rëndësi të lartë për qeverinë britanike.
“Samiti do të forcojë bashkëpunimin me partnerët nga Ballkani Perëndimor në luftën kundër migracionit të paligjshëm në rrugët kryesore të kontrabandës”, thuhet në njoftimin e Zyrës së Jashtme britanike.
Sipas revistës Politico, gjatë samitit mund të finalizohet edhe një marrëveshje e rëndësishme mes Mbretërisë së Bashkuar dhe Kosovës, si pjesë e përpjekjeve për bashkëpunim më të ngushtë në siguri dhe menaxhimin e migrimit.
Procesi i Berlinit u iniciua në vitin 2014 nga kancelarja gjermane Angela Merkel për të mbështetur integrimin e vendeve të Ballkanit Perëndimor në BE dhe për të nxitur bashkëpunimin ekonomik dhe politik ndërmjet tyre.
Dhjetë vjet më vonë, nisma – që shumë analistë e kanë quajtur “fëmija politik i Merkelit” – vazhdon të jetë një nga platformat më të rëndësishme të dialogut mes rajonit dhe BE-së, edhe pse zgjerimi evropian mbetet ende i bllokuar.
