Tensionet mes Shteteve të Bashkuara dhe Iranit janë përshkallëzuar sërish, pasi marrëveshja e përkohshme e armëpushimit ka dështuar dhe të dyja palët kanë rifilluar operacionet ushtarake.

Irani ka ndërmarrë sulme ndaj aleatëve të SHBA-së në rajonin e Gjirit Persik, ndërsa forcat amerikane kanë bombarduar objektiva iraniane për natën e tetë radhazi.

Marrëveshja e arritur muajin e kaluar synonte pezullimin e luftimeve për t’u dhënë kohë palëve të punonin për rihapjen e Ngushticës së Hormuzit, rruga detare nga ku kalon rreth një e pesta e tregtisë botërore të naftës. Megjithatë, Teherani njoftoi të shtunën se po pezullonte angazhimet e tij, duke akuzuar Uashingtonin se kishte shkelur i pari marrëveshjen.

Komanda Qendrore e SHBA-së (CENTCOM) bëri të ditur se sulmet e fundit kishin si objektiv ndëshkimin e Gardës Revolucionare Islamike pas sulmit në Jordani, ku humbën jetën dy ushtarakë amerikanë.

Sipas CENTCOM, operacionet goditën sistemet bregdetare të mbikëqyrjes, mbrojtjen ajrore, kapacitetet detare, si dhe depot e raketave dhe dronëve të Iranit, me synimin për të dobësuar aftësinë e Teheranit për të kërcënuar lundrimin në Ngushticën e Hormuzit.

Nga ana tjetër, komanda e përbashkët ushtarake iraniane deklaroi se “lakmia, arroganca, totalitarizmi dhe brutaliteti” i SHBA-së do të përballen me një “përgjigje shkatërruese”.

Sulmet iraniane goditën për herë të dytë brenda dy ditësh një impiant të prodhimit të energjisë elektrike dhe desalinizimit të ujit në Kuvajt, duke shkaktuar zjarr në një vend që siguron rreth 90% të ujit të pijshëm përmes desalinizimit.

Bahreini njoftoi se kishte interceptuar sulme ajrore, ndërsa Jordania bëri të ditur se rrëzoi tre nga katër raketat iraniane të lëshuara drejt territorit të saj.

Izraeli paralajmëroi gjithashtu se predhat e lëshuara drejt qytetit portual Akaba mund të depërtojnë për herë të parë pas javësh edhe në territorin izraelit.

Sekretari amerikan i Energjisë, Chris Wright, deklaroi se pavarësisht luftimeve, nafta vazhdon të kalojë përmes Ngushticës së Hormuzit.

Ai tha se aktualisht qarkullojnë rreth 14 milionë fuçi naftë në ditë, ose rreth dy të tretat e nivelit normal para nisjes së konfliktit.

Ndërkohë, Organizata e Energjisë Atomike e Iranit njoftoi se sulmet amerikane kanë goditur edhe centralin bërthamor të Darkhovinit, në provincën Khuzestan.

Agjencia Ndërkombëtare për Energjinë Atomike (IAEA) konfirmoi se po verifikon informacionin, duke theksuar se objekti është ende në fazë ndërtimi, nuk përmban material bërthamor dhe nuk paraqet rrezik radiologjik.

Autoritetet iraniane deklaruan se sulmet e fundit amerikane kanë shkaktuar 50 të vdekur dhe 517 të plagosur.

Ndërkohë, udhëheqësi suprem i Iranit, Mojtaba Khamenei, deklaroi të shtunën se firma e presidentit amerikan Donald Trump në marrëveshjen e përkohshme ishte “plotësisht pa vlerë dhe pa asnjë besueshmëri”.

I pyetur për vendimin e Iranit për t’u tërhequr nga marrëveshja, Trump u përgjigj shkurt: “Nuk më intereson aspak.”