×
Tuesday, June 30, 2020

Kina miraton ligjin e sigurisë për Hong Kongun

June 30, 2020

Kina miratoi një ligj të sigurisë kombëtare për Hong Kongun, i cili, sipas kritikëve, do të minojë të drejtat e njeriut në rajonin gjysëm-autonom.

Ligji u miratua nga Komiteti i Përhershëm Kombëtar i Kongresit Popullor të Kinës, që është organi më i lartë ligjvënës në këtë vend.

Ai është kritikuar nga qeveritë perëndimore dhe ka qenë në qendër të protestave pro demokracisë të muajve të fundit në Hong Kong.

“Ligji shënon fundin e Hong Kongut që bota e njihte më parë”, shkroi në Twitter aktivisti pro demokracisë në Hong Kong, Joshua Wong.

Pekini ka hartuar ligjin në përgjigje të protestave pro demokracisë të vitit të kaluar në Hong Kong, duke thënë se ai është i nevojshëm për kthimin e stabilitetit në këtë vend.

Legjislacioni kriminalizon ndarjen, përmbysjen e pushtetit shtetëror dhe bashkëpunimin me forcat e huaja.

Autoritetet e Pekinit dhe Hong Kongut thonë se legjislacioni shënjestron disa “shkaktarë të telasheve” dhe se nuk do të ndikojë në të drejtat dhe liritë e njeriut dhe as në interesat e investitorëve.

Hong Kongu, qysh në vitin 1997, është pjesë e Kinës në bazë të organizimit “një shtet, dy sisteme”.

Ai ka disa të drejta që nuk i gëzon pjesa tjetër e territorit kinez, por protestuesit ankohen se ato po kufizohen gjithnjë e më shumë nga regjimi në Pekin.

Eunews.al

Komente

avatar
  Ndiqe  
Me lajmëro për