JD Vance: Britania është zhgënjyer nga udhëheqja e saj, i duhet një ndryshim i thellë

Zëvendëspresidenti i SHBA-së, JD Vance, ka deklaruar se Britania e Madhe është “dështuar nga udhëheqja e saj për një kohë të gjatë”, pas dorëheqjes së kryeministrit Keir Starmer.

Në një intervistë për The Sunday Times, Vance, i njohur për kritikat e tij ndaj Mbretërisë së Bashkuar dhe Evropës, e cilësoi Britaninë si një vend të mrekullueshëm, por tha se politika britanike po përballet me probleme të thella.

“Mendoj se ka diçka shumë të thyer në politikën britanike. Njerëzit po kërkojnë ndryshime të rëndësishme strukturore”, u shpreh ai.

Vance tha se shpreson që Andy Burnham, ose një tjetër drejtues i ardhshëm, të jetë në gjendje të rikthejë vendin në rrugën e duhur.

“Shpresoj që Andy Burnham – dhe nëse jo ai, dikush tjetër – ta sjellë këtë ndryshim. Britania është një vend kaq i bukur, një vend kaq i mrekullueshëm”, shtoi zëvendëspresidenti amerikan.

Keir Starmer njoftoi dorëheqjen muajin e kaluar, pas presionit të shtuar nga rezultatet e dobëta të Partisë Laburiste në zgjedhjet lokale. Ai do të qëndrojë në detyrë deri në zgjedhjen e pasardhësit të tij.

Ndër kandidatët kryesorë për ta zëvendësuar është deputeti Andy Burnham, ish-kryetar i bashkisë së Greater Manchester, i cili fitoi zgjedhjet e pjesshme në Makerfield.

Edhe presidenti amerikan Donald Trump ka kritikuar më herët Starmer, duke e akuzuar për dështim në menaxhimin e emigracionit dhe politikave energjetike.

“Ai dështoi keq në dy tema shumë të rëndësishme – emigracionin dhe energjinë”, është shprehur Trump.