“The Sun”: Shqipëria mes destinacioneve më të lira për pushime verore në Evropë

Nëse po kërkoni pushime verore me plazhe me diell, ujëra të kristalta dhe hotele të bukura, por me një buxhet të kufizuar, dhe nuk është e nevojshme të hiqni dorë nga planet e udhëtimit, shkruan media britanike “The Sun”.

Në Evropë ekzistojnë ende destinacione, që ofrojnë çmime shumë më të ulëta se resortet klasike si Spanja apo Greqia, pa humbur cilësinë e pushimeve.

Janë përzgjedhur tre vende që po tërheqin gjithnjë e më shumë turistë, falë paketave shumë të lira, që nisin nga vetëm £159 për person.

Shqipëria – perla e Adriatikut me çmime të pakrahasueshme

Mes destinacioneve më të përballueshme dhe më të bukura në Evropë, Shqipëria po fiton gjithnjë e më shumë vëmendje ndërkombëtare.

Me mbi 300 ditë diell në vit, vendi ofron një vijë bregdetare të jashtëzakonshme, ku bashkohen ujërat e kristalta të Adriatikut dhe Jonit me peizazhe malore dramatike.

Qyteti i Durrësit është një nga zgjedhjet më të mira për pushime ekonomike, por të pasura me histori dhe det.

Vizitorët mund të eksplorojnë Kullën Veneciane, rrënojat romake dhe plazhet e gjera pa shpenzime të mëdha.

Po ashtu, Vlora po shndërrohet në një nga destinacionet më moderne turistike në vend, me hotele luksoze me çmime të përballueshme, shëtitore të gjalla dhe mundësi për udhëtime me varkë drejt shpellave detare.

Një shembull është një paketë 5-netëshe në një hotel me katër yje në Vlorë, me plazh privat dhe spa, që përfshin fluturime vajtje-ardhje nga Londra dhe mëngjes, me çmim rreth £219 për person.

Përveç Shqipërisë, edhe Mali i Zi dhe Bullgaria ofrojnë pushime shumë ekonomike, me resorte moderne, plazhe të pastra dhe paketa turistike që mbeten ndër më të lirat në Evropë.

Këto destinacione po kthehen në zgjedhje gjithnjë e më të preferuara për turistët, që kërkojnë kombinimin ideal mes çmimit të ulët dhe përvojës cilësore verore.