Ursula von der Leyen dhe Recep Tayyip Erdoğan bisedë për Iranin dhe stabilitetin në rajon
Presidentja e Komisionit Evropian, Ursula von der Leyen, ka njoftuar se ka zhvilluar një bisedë telefonike me presidentin e Turqisë, Recep Tayyip Erdoğan, ku në fokus kanë qenë zhvillimet në Lindjen e Mesme dhe marrëdhëniet BE–Ankara.
Në një postim në rrjetin social X, Ursula von der Leyen e cilësoi Turqinë si një partner kyç në një rajon me tensione të larta, duke theksuar rolin e saj në përpjekjet për deeskalim dhe zgjidhje diplomatike të konfliktit me Iranin.
Sipas saj, gjatë bisedës u diskutuan gjithashtu çështjet e Mesdheut Lindor dhe Qipros, si dhe rëndësia e forcimit të marrëdhënieve mes Bashkimit Evropian dhe Turqisë.
Ajo theksoi se interesat e përbashkëta përfshijnë ruajtjen e rrugëve tregtare të hapura, stabilitetin e furnizimeve energjetike dhe funksionimin e zinxhirëve globalë të furnizimit, në një kohë pasigurie të shtuar ndërkombëtare.
Komisioni Evropian, sipas deklaratës, vlerëson rolin e Turqisë dhe mbështet përpjekjet diplomatike për uljen e tensioneve në rajon, duke theksuar gatishmërinë për të vijuar bashkëpunimin në kuadër të OKB-së për proceset e paqes.
